بریندار بوونی دوو کۆڵبەر لە سنوورەکانی کوردستان

بریندار بوونی دوو کۆڵبەر لە سنوورەکانی کوردستان

16:14 - 1 September 2020

 

هەنگاو: دوو کۆڵبەر لە کاتی کۆڵبەری لە سنوورەکانی کوردستان بە تەقەی هێزە چەکدارەکانی ئێران و تورکیا بریندار بوون.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانی ڕۆژی سێشەممە ١١ی خەرمانانی ٢٧٢٠ (١ی سێپتامبری ٢٠٢٠)، هێزە چەکدارەکانی تورکیا لە سنوورەکانی شاری خۆی سەر بە پارێزگای ئورمیە تەقەیان لە پۆلێک کۆڵبەر کردووە و لە ئاکامدا کۆڵبەرێک بە سەختی بریندار بووە.

ناسنامەی ئەو کۆڵبەرەی کە بریندار بووە ”سەیوەندین کڵاشی“ تەمەن ٣٥ ساڵ و خەڵکی گوندی ”گیوران“ی ناوچەی کۆتۆل ڕاگەیەندراوە کە بە مەبەستی چارەسەریی پزیشیکی ڕەوانەی ناوەندە دەرمانییەکانی شاری وان کراوە.

لەلایەکی دیکەوە و هاوکات، هێزە چەکدارەکانی ئێران لە سنووری نەوسوود تەقەیان لە کۆڵبەران کردووە و لە ئاکامدا کۆڵبەرێکی تەمەن ٢٧ ساڵی خەڵکی بەخشی شاهۆی ڕوانسەر بە ناوی ”حەمید حوسێنی“ بە سەختی بریندار بووە. ناوبراو بە مەبەستی چارەسەریی پزیشکی ڕەوانەی ناوەندە دەرمانییەکانی شاری کرماشان کراوە.
 

بەپشتبەستن بە ئاماری تۆمارکراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لەماوەی مانگی ئاگۆستی ئەمساڵ ٣١ کۆڵبەر و کاسبکاری کورد بریندار بوون.