شەش گریلای پژاک لە کامیاران کەوتنە بۆسەی سپا و گیانیان لە دەست دا

19:56 - 8 September 2018

 

هەنگاو: شەش گریلای پارتی ژیانی ئازادی کوردستان لە دەورووبەری شاری کامیاران سەر بە پارێزگای سنە کەوتنە بۆسەیەکی هێزەکانی سپای پاسداران و گیانیان لە دەست دا.

بەپێی هەواڵی ڕێکخراوی مافی مرۆڤی هەنگاو، ئێوارەی ڕۆژی هەینی (١٦ی خەرمانانی ٢٧١٨ / ٧ی سێپتامبری ٢٠١٨)، گرووپێکی گریلاکانی پژاک لە ناوچەی ”پیرباخ“ی کامیاران کەووتەنەتە بۆسەی هێزەکانی سپای پاسداران و لە ئاکامدا ٦ گریلا گیانیان لە دەست داوە.

ڕۆژی ڕابردوو ناوەندی حەمزەی سپای پاسداران هەواڵی گیان لە دەست دانی ٦ گریلای ڕاگەیاندبوو، بەڵام هیچ ئاماژەیەکی بە شوێنی تێکهەڵچوونەکە نەکردبوو.

سەرچاوەکانی هەنگاو ڕایانگەیاندووە کە تەرمی ئەو ٦ گریلایە لەلایەن سپای پاسدارانەوە بۆ سنە گوازراوەتەوە.

هەتا ئێستا پژاک هیچ کاردانەوەیەکی بە نیسبەت ئەو هەواڵە نیشان نەداوە، بەڵام سەرچاوەیەکی نزیک لە پژاک ئەو هەواڵەی بۆ هەنگاو پشتڕاست کردوەتەوە.