٧ ئەندامی کەمپینی خێرخوازی «ژیانەوەی کوردستان» سزای بەندکرانیان بە سەردا سەپا

٧ ئەندامی کەمپینی خێرخوازی «ژیانەوەی کوردستان» سزای بەندکرانیان بە سەردا سەپا

13:57 - 19 May 2022

 

هەنگاو: پێنجشەممە ٢٩ی بانەمەڕی ٢٧٢٢

حەوت ئەندامی کەمپینی خێرخوازی ژیانەوەی کوردستان لە شاری سنە بە ناوەکانی علی ئەڵڵاوەیسی، فەردین ڕەحیمی، عەتا ڕەزاڕەبابی، قانع خاتری، مەرزیە مورادوەیسی، سیروان عەبدووڵڵاهی (کوڕی مەرزیە مورادوەیسی) و مەهدی سەیفی لەلایەن لقی یەکی دادگای شۆڕشی سنەوە بە سەرۆکایەتی دادوەر سەعیدی هەرکام سزای ٢ ساڵ بەندکرانیان بەسەردا سەپێندرا.

بە پێی ئەم سزایە عەتا ڕەزاڕەبابی سزای ٢ ساڵ بەندکرانی هەڵپەسێردراو و ٦ کەسەکەی دیکە هەر کام سزای ٢ ساڵ بەندکرانیان بەسەردا سەپێندرا.

ئەم سزایە بە تۆمەتی «دروستکردنی گرووپی نایاسایی» و «هاوکاری و پەیوەندی لەگەڵ گرووپی دژبەری نیزام» دەرچووە و ئەمڕۆ پێنجشەممە ٢٩ی بانەمەڕی ٢٧٢٢ بەم هاووڵاتییانە ڕاگەیەندراوە. دادگا تەنیا ئیزنی داوە چاویان بە ناوەڕۆکی سزاکە بکەوێت.

دانیشتنی یەکەمی دادگای ئەم حەوت ئەندامەی کەمپینی «ژیانەوەی کوردستان» ڕۆژی شەممە ١٥ی خەزەڵوەر و دانیشتنی دووەمیان سەرماوەزی ساڵی ڕابردوو بەڕێوەچووە.

شایانی باسە کە ئەم حەوت کەسە مانگی خاکەلێوەی ساڵی ڕابردوو لەلایەن هێزە ئەمنییەکانی ئیدارەی ئیتلاعاتی سنە دەستبەسەر و دوای ماوەیەک بە دانانی بارمتە ئازاد کران.