کۆڵبەرێکی مێرمنداڵ لەلایەن چەکدارانی ئێرانەوە بریندار کرا
هەنگاو: کۆڵبەرێکی مێرمنداڵ لە کاتی کۆڵبەری لە سنوورەکانی نەوسوود سەر بە پارێزگای کرماشان لەلایەن هێزە چەکدارەکانی ئێرانەوە
١٧ گەلاوێژ ٢٧٢٠، ٢٣:٥٠
هەنگاو: کۆڵبەرێکی مێرمنداڵ لە کاتی کۆڵبەری لە سنوورەکانی نەوسوود سەر بە پارێزگای کرماشان لەلایەن هێزە چەکدارەکانی ئێرانەوە درایە بەر لێدان و کوتان و بە سەختی بریندار کرا.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ئێوارەی ڕۆژی پێنجشەممە ١٦ی گەلاوێژی ٢٧٢٠(٦ی ئاگۆستی ٢٠٢٠)، هێزە چەکدارەکانی ئێران لە بەرزاییەکانی سنوور پۆلێک کۆڵبەریان داوەتە بەر لێدان و کوتان و لە ئەنجامدا کۆڵبەرێک بە سەختی بریندار بووە.
هەواڵنێری هەنگاو لە شاری پاوە ڕایگەیاند کە، کۆڵبەرێکی تەمەن ١٦ ساڵ بە ناوی “موبین حوسێنی” کوڕی سیرووس و خەڵکی گوندی “دووریسان” لەلایەن هێزە چەکدارەکانەوە بە قونداغی چەک لە سەر و چاوی دراوە و بریندار کراوە.
موبین حوسێنی بە مەبەستی چارەسەریی پزیشکی ڕەوانەی ناوەندە دەرمانییەکانی شاری پاوە کراوە و باری تەندروستی جێگیر ڕاگەیەندراوە.
