کۆڵبەرە ونبووەکەی بانە، دەستبەسەر کراوە

کۆڵبەرێکی خەڵکی سەقز کە چەند ڕۆژ پێش ون ببو، لەلایەن هێزە ئەمنیەتیەکانی حکومەتی ئێرانەوە دەستبەسەر کراوە.

بەپێی هەواڵی ڕێکخراوی مافی مرۆڤی هەنگاو، عەباس قادرزادە کۆڵبەری خەڵکی سەقز و دانیشتووی بانە کە ڕۆژی دووشەممە (٨ی ڕێبەندانی ٢٧١٨/ ٢٨ی ژانویەی ٢٠١٩) ون ببو، لەلایەن هێزە ئەمنییەکانی حکوومەتی ئێرانەوە دەستبەسەر کراوە.

یەکێک لە نزیکانی قادرزادە بە هەواڵنێری هەنگاوی ڕاگەیاند: “ئەمڕۆ بە ژمارەیەکی نەناسراو پەیوەندیان پێوە کردووین و پێیان ڕاگەیاندین کە بە دوای عەباس مەگەرێن و ئێستا لای ئێمە دەستبەسەرە”.

ئەو کۆڵبەرە ڕۆژی دووشەممە لە حاڵێکدا کە دوو کۆڵبەری دیکەی هاوڕێی بە هۆی سەرماوە گیانیان لەدەست داوە، ون بوو و لەو کاتەوە خەڵکی ناوچەکە بۆ دۆزینەوەی بەشوێنیدا دەگەڕان.

ڕۆژی دووشەممە دوای هێرشی هێزە چەکدارەکانی بۆ سەر کاروانی کۆڵبەران لە بانە دوو کۆڵبەر بریندار بوون و دوو کۆڵبەری دیکە بە ناوەکانی سامان ساڵحی تەمەن ٢٢ ساڵ خەڵکی سەقز و محەمەد کەریمی خەڵکی ئاوایی شوێی بانە، ڕێگەیان لێ ون دەبێت وبە هۆی سەرماوە گیانیان لەدەست دا.