بەندیخانەی دیزڵئاوا؛ بەردەوامیی دەستبەسەرکران و ناڕوونی چارەنووسی خالید مەحموودی
هەنگاو؛ شەممە ١٦ی پووشپەڕی ٢٧٢٤
خالید مەحموودی، هاووڵاتیی خەڵکی ڕوانسەر کە ئەمساڵ بۆ دووەمین جار لەلایەن هێزە ئەمنییەکانی کۆماری ئیسلامیی ئێران لە شاری جوانڕۆ دەستبەسەر کراوە تا ئێستا چارەنووسی نادیارە و لە بەندیخانەی دیزڵئاوا دەستبەسەرە. ناوبراو لە دەستبەسەرکراوانی بزووتنەوەی "ژن ژیان ئازادی" بووە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، خالید مەحموودی، تەمەن ٢٠ ساڵ و خەڵکی گوندی "شانڕەش" سەر بە شاری ڕوانسەر و دانیشتووی جوانڕۆ، یەک مانگ و ١٨ ڕۆژی ڕابردووی لە بەندیخانەی دیزڵئاوای کرماشان تێپەڕ کردووە و تا ئێستا چارەنووسی نادیارە.
خالید مەحموودی، ڕۆژی ٢٨ی بانەمەڕی ٢٧٢٤ (١٧ی مەی ٢٠٢٤)، لەلایەن هێزەکانی ئیدارەی ئیتلاعات و بەبێ نیشاندانی هیچ بەڵگەیەکی دادوەری لە یەکێک لە شەقامەکانی جوانڕۆ دەستبەسەر کرا و دواتر بۆ بەندیخانە گواسترایەوە.
سەرەڕای تێپەڕبوونی ٥٠ ڕۆژ لە کاتی دەستبەسەرکرانی ناوبراو، هێشتا لە هۆکارەکانی دەستبەسەرکران و ئەو تۆمەتانەی دراونەتە پاڵی، زانیارییەک لەبەر دەستدا نییە.
ناوبراو ڕۆژی سێشەممە ١ی سەرماوەزی ٢٧٢٢ (٢٢ی نۆڤەمبەری ٢٠٢٢)، لە ڕەوتی بزووتنەوەی ژن ژیان ئازادی لەلایەن هێزە ئەمنییەکانەوە دەستبەسەر کرا و بۆ بەندیخانەی دیزڵئاوای کرماشان گواسترایەوە و دوای زیاتر لە چوار مانگ دەستبەسەربوون، لە ڕێکەوتی ٦ی خاکەلێوەی ٢٧٢٣، بەدانانی بارمتە و بەشێوەی کاتی لەو بەندیخانەیە ئازاد کرا.
خالید مەحموودی لە ماوەی دەستبەسەربوونیدا لە سەرەکیترین مافەکانی خۆی بێبەش کرابوو و بە هاوکاری لەگەڵ حیزبە کوردستانییەکانی ئۆپۆزیسیۆن تۆمەتبار کرابوو. ئەو هاووڵاتییە هەروەها بەسەختی لەلایەن هێزە ئەمنییەکانەوە ئەشکەنجە درابوو و ناچار بە دانپێدانانی زۆرەملێی دژ بەخۆی کرا کە ئەو دانپێدانانە لە دەنگ و ڕەنگی کۆماری ئیسلامیدا بڵاو کرابووەوە.
