خۆکوشتنی کچێکی قوربانیی منداڵ‌هاوسەری لە کرماشان

هەنگاو: یەکشەممە، ١٤ی جۆزەدرانی ٢٧٢٣

کچێکی تەمەن ١٥ ساڵ و دانیشتووی شاری کرماشان بە ناوی شەکیلا غوڵامی، بەهۆی بەردەوامیی گوشارەکانی بنەماڵەکەی بۆ ڕازیبوون بە هاوسەرگیریی زۆرەملێ لەگەڵ پیاوێک کە خۆیان بۆی دەستنیشانیان کردبوو، بەناچار هەوڵی خۆکوژی داوە و کۆتایی بە ژیانی خۆی هێنا.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو؛ ڕۆژی پێنجشەممە، ١١ی جۆزەردانی ٢٧٢٣ (١ی ژوئەنی ٢٠٢٣)، شەکیلا غوڵامی، تەمەن ١٥ ساڵ و دانیشتووی گەڕەکی "دەرەدرێژ"ی شاری کرماشان، هەوڵی خۆکوشتنی داوە و دەستبەجێ گیانی لەدەست داوە.

بە وتەی سەرچاوەیەکی ئاگادار، ئەو کچە مێرمنداڵە، ئارەزووی درێژەدان بە خوێندنی هەبوو و لەگەڵ ئەوەشدا باوکی هەوڵی داوە بە شێوەیەکی زۆرەملێ شەکیلا ناچار بکات کە ڕازی بێت و شوو بەو کەسە بکات کە بنەماڵەکەی بۆی دەستنیشانیان کردووە. لەبەر ئەم هۆکارە ناوبراو لە کاتێکدا دەستگیراندار بووە، بەهۆی گشاری دەروونیی بنەماڵەکەیەوە بە چەکەکەی باوکی تەقەی لە خۆی کردووە و کۆتایی بە ژیانی خۆی هێناوە.

شایانی باسە کە دوانیوەڕۆی ڕۆژی شەممە، ١٣ی جۆزەردان، تەرمی شەکیلا غوڵامی لە گۆڕستانی سەرووی "قەلەندەربەیگ"ی گوندی قەڵازەنجیر لە شاری داڵاهۆ ئەسپەردە کراوە.