دادوەری گشتیی سنە خوازیاری بە سزا گەیاندنی یازدە هاووڵاتیی خەڵکی سنەیە کە دژی خستنەخوارەوەی فڕۆکە ئۆکراینییەکە هەڵوێستیان گرتووە
هەنگاو: یازدە هاووڵاتیی خەڵکی سنە کە لە رێوڕەسمی بەخاکسپاردنی گیان بەختکردوانی فرۆکە ئۆکراینییەکە کە لە لایەن سوپای پاسدارانەوە، خر
هەنگاو: یازدە هاووڵاتیی خەڵکی سنە کە لە رێوڕەسمی بەخاکسپاردنی گیان بەختکردوانی فرۆکە ئۆکراینییەکە کە لە لایەن سوپای پاسدارانەوە، خرابوویەخوارەوە بەشدارییان کردبوو و خوازیاری دادگاییکردنی بکەرانی ئەو تاوانه بووبوون، لە لایەن ئیتلاعاتی هێزی ئینتزامییەوە دەستبەسەر و بۆ دادگای شۆڕش و دادگای تاوانەکانی ٢ی سنە بانگ کراون.
بە پێی راپۆرتی گەیشتوو بە رێکخراوی مافی مرۆڤی هەنگاو، ژمارەیەک هاووڵاتیی سنەیی کە لە کووبوونەوەیەکی هێمنانە، تەقاندنەوەی فرۆکەی ئۆکراینییەکەیان ئیدانە کردبوو و خوازیاریی سزادانی تۆمەتبارانی ئەو دۆسیەیە بوون، لە لایەن ئیتلاعاتی هێزی ئینتزامیی سنەوە دەستبەسەر و دۆسیەکەیان بەڕێ کراوە بۆ لقی ئەمنییەتیی ( لقی ٧) خانەی دادی سنە.
لە ئاکامدا دۆسیەی ئەو کەسانە بە دەرکردنی بڕیاری دەستبەسەر و دادگاییکردن، بە تۆمەتگەلی سووکایەتی بە رێبەری کۆماری ئیسلامی، تێکدانی ئاسایشی گشتی و کۆبوونەوە بە مەبەستی تێکدانی ئاسایشی نێوخۆیی وڵات و بە پەسندکردنی لەلایەن دادوەری گشتیی شاری سنە، بۆ لقی یەکی دادگای شۆرش و هەروەها دادگایتاوانەکانی ٢ی سنە بەڕێ کراوە.
هەواڵنیری هەنگاو لە سنە ناسنامەی ئەو یازدە کەسەی بەم شێوەیە ڕاگەیاندووە:
١_ شیوا ئەحمەدی سیاناوی
٢_ زەهرا مورادی تەمەن ٦٦ ساڵ
٣_ پدرام هوشیارییان تەمەن ٣١ ساڵ
٤_ماریا ساعەدپەنا تەمەن ٤١ ساڵ
٥_ عەبدوڵا ئەمینی نبی کەندی
٦_ لەیلا حوسێنی تەمەن ٤٦ ساڵ
٧_ زارا ساعەدپەنا
٨_ یوونس فکری
٩_ محەممەد سینا میرزایی تەمەن ٣١ ساڵ
١٠_ سەید غازی حوسێنی
١١_ سروور شەهابی تەمەن ٥٤ ساڵ
بە وتەی سەرچاوەیەکی ئاگادار ئەو یازدە کەسە پاش ئەوەیکە لە کاتی رێوڕەسمی بەخاکسپاردنی ئاروین مورەتەب و ئایدا فەرزانە دوو کەس لە سەرنشینانی فرۆکە ئۆکراینییەکە، بە هۆی کامێرای چاودێرییەوە ناسراون و دەستبەسەر کرابوون و پاش دوو حەوتوو بە دانانی بارمتە بە شێوەی کاتی تا کاتی دادگایی ئازاد کرابوون.
بە پێی ئەو داواکارییەی کە رۆژانی ١٧ و ٢٠ رێبەندانی ئەمساڵ نێردراوە بۆ ئەو یازدە کەسە، دەبێ رۆژی یەکشەممە ٣ی رەشەمەی ٢٧٢٠( ٢١ فێورییەی ٢٠٢١ لە لقی یەکی دادگای شۆڕشی سنە و رۆژی سێشەممە ١٧ی خاکەلێوە ٢٧٢١( ٦ ی ئاپریلی ٢٠٢١) لە لقی ١٠٢ی دادگای سزادانی ٢ی سنە ئامادە ببن.
