دادگایی کرانی ٨ چالاکی سەقزی بۆ کاتێکی دیکە دوا خرا

هەنگاو: بەڕێوەچوونی دادگایی کرانی ٨ چالاکی مەدەنی خەڵکی سەقز کە بانگهێشت کرابوون بۆ کاتێکی دیکە دوا خرا.

بەپێێ هەواڵی گەیشتوو بە ڕێکخراوی مافی مرۆڤی هەنگاو، دادگایی کرانی ٨ چالاکی سەقزی کە بڕیار بوو کاتژمێر ١٠ی بەیانی ئەمڕۆ سێشەممە (٢٩ی جۆزەردان ٢٧١٨/ ١٩ ژوئەنی ٢٠١٨)  بەڕێوە بچێت، بە هۆی حازر نەبوونی قازی دادگای شۆڕشی ئەو شارە بۆ کاتێکی دیکە دوا خرا.

دادگای شۆڕشی سەقز ڕۆژی یەکشەممە ئەو ٨ کەسەی بە تۆمەتی بەڕێوەبردنی ڕێوڕەسمی نەورۆزی ئاوایی ئایچی ئەو شارە بانگهێشت کردبوو.

ناسنامەی ئەو ٨ کەسە بە شێوەی خوارەوەیە؛

سەید عەلی حوسەینی، مامۆستا، سولەیمان عەبدی مامۆستا، موحەممەد عابدی، نوسەر ،  لوقمان قورەیشی، مزەفەر ئیبراهیم پووڕ چالاکی ژینگەپارێز، هەژار شەریفی، عەتا ڕەحمان زادە ناسراو بە عەتا شەماڵ و مامۆستا مەلا حەسەن مەحموودی بەرنوێژی گوندی کانی نیاز.

ئەم هەشت هاووڵاتیە لە ماوەی یەکساڵی ڕابردوو بە تۆمەتی بەڕێوەبردنی نەورۆزی ٢٧١٦ لە ئاوایی ئایچی لە شاری سەقز بانگهێشتی دادگا کراون.