بەندیخانەی قزڵحیساری کەرەج؛ گیان لە دەستدانی بەندکراوێکی کورد بەهۆی پێڕانەگەیشتنی پزیشکی
هەنگاو؛ دووشەممە ٢٤ی بانەمەڕی ٢٧٢٤
بەندکراوێکی کورد بە ناوی کیانووش وەلەدبەیگی کە بە تۆمەتی پەیوەندیدار بە مادە هۆشبەرەکان لە بەندیخانەی قزڵحیساری کەرەج ڕاگیرابوو، بەهۆی پێڕانەگەیشتنی پزیشکی و درەنگ گواستنەوەی بۆ ناوەندە دەرمانییەکان، گیانی لەدەستدا.
بەپێی ڕاپۆرتی گەیشتوو بە ڕێکخراوەی مافی مرۆڤی هەنگاو، ڕۆژی چوارشەممەی هەفتەی ڕابردوو ١٩ی بانەمەڕی ٢٧٢٤ (٨ی مەی ٢٠٢٤)، بەندکراوێکی کورد و خەڵکی گوندی نۆریاو سەر بە شاری پاوە بە ناوی کیانووش وەلەدبەیگی تەمەن٣٥ ساڵ، لە کاتێکدا حەوتەمین ساڵ لە ماوەی سزاکەی لە بەندیخانەی قزڵحیساری کەرەج تێدەپەڕاند، بەهۆی پێڕانەگەیشتنی پزیشکی و درەنگ گواستنەوەی بۆ ناوەندە دەرمانییەکان، لە یەکێک لە نەخۆشخانەکانی تاران گیانی لەدەستدا.
بە وتەی سەرچاوەیەک ئاگادار، فایەق وەلەدبەیگی لە ماوەی ساڵەکانی ڕابردوو لە نەخۆشی گورچیلە و نەخۆشی دڵ ڕەنجی دەبرد و بەرپرسانی بەندیخانەکە لە پێدیانی ئیزنی مرەخەسیی دەرمانی بە ناوبراو ڕێگرییان کردووە.
لەم بارەوە سەرچاوەیەک نزیک لە بنەماڵەی وەلەدبەیگی بە هەنگاوی ڕاگەیاند: کیانووش وەلەدبەیگی ٧ ساڵی پێش لە شیراز بە تۆمەتی پەیوەندیدار بە مادە هۆشبەرەکانەوە دەستبەسەر و سزای ١٨ ساڵ بەندکران بە سەریدا سەپێنرابوو. ناوبراو نزیکەی دوو ساڵ پێش لە بەندیخانەی عادڵئاوای شیراز بۆ بەندیخانەی قزڵحیساری کەرەج گواسترابووە.
بە پشتبەستن بە ئاماری تۆمارکراو لە ناوەندی ئامار و بەڵگەکانی ڕێکخراوەی مافی مرۆڤی هەنگاو، لە ماوەی پێنج مانگی سەرەتای ساڵی ٢٠٢٤، لانی کەم ١٥ بەندکراو لە بەندیخانەکانی ئێران گیانیان لەدەستداوە کە ٨ کەس لەوانە بەندکراوی کورد بوون.
