ڕێوڕەسمی نەورۆز؛ ئازادی کاتیی چوار هاووڵاتیی کورد بە دانانی بارمتە
هەنگاو؛ شەممە ١٦ی خاکەلێوەی ٢٧٢٥
چوار هاووڵاتیی کوردی خەڵکی ناوچەی کەڵاتەرزانی سنە بە ناوەکانی شێروان حەیدەری، ئیدریس حەیدەری، سیروان حاتەمی و مەحموود نادری بە دانانی بارمتە بە شێوەی کاتی تا کاتیی کۆتایی هاتنی دادگاییەکەیان لە بەندیخانە ئازاد کران. دەستبەسەرکرانی ئەم کەسانە لە پەیوەندی لەگەڵ ڕێوڕەسمەکانی نەورۆز لە کوردستان بووە.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی شەممە ١٦ی خاکەلێوەی ٢٧٢٥ (٥ی ئەپریلی ٢٠٢٥)، شێروان حەیدەری تەمەن ٣٧ ساڵ، ئیدریس حەیدەری تەمەن ٣٠ ساڵ و سیروان حاتەمی تەمەن ٤٠ ساڵ، کە هەموویان خەڵکی گوندی "ئەوێهەنگ"ی سەر بە سنەن و مەحموود نادری، هاووڵاتیی تەمەن ٤٥ ساڵ و خەڵکی گوندی "دادانە کەمانگەر"ی ناوچەی کەڵاتەرزانی سنە بە دانانی بارمتەی ٥٠٠ ملیۆنی بە شێوەی کاتی ئازاد کران.
شیروان حەیدەری، ئیدریس حەیدەری و سیروان حاتەمی ڕؤژی یەکشەممە ٣ی خاکەلێوەی ٢٧٢٥
(٢٣ی مارسی ٢٠٢٥)، لە لایەن هێزە ئەمنییەکانەوە دەستبەسەر کران.
مەحموود نادری ڕۆژی شەممە ٢ی خاکەلێوەی ٢٧٢٥ (٢٢ی مارسی ٢٠٢٥)، دوای بانگکرانی و چوونی بۆ ئیتلاعاتی سوپا لە سنە دەستبەسەر کرابوو.
دەستبەسەرکرانی مەحموود نادری لە حاڵێکدا بووە کە ئەم هاووڵاتییە لە ناوەڕاستی مانگی ڕەشەممە، بە دانانی بارمتەی ٥٠٠ ملیۆنی بە شێوەی کاتی تا کاتیی کۆتاییهاتنی دادگاییەکەی لە بەندیخانە ئازاد کرابوو.
ناوبراو ڕۆژی سێشەممە ١٤ی ڕەشەممەی ٢٧٢٣ (٤ی مارسی ٢٠٢٥)، دوای بانگکران و چوونی بۆ ئیدارەی ئیتلاعات لە سنە دەستبەسەر کرابوو.
