ڕێوڕەسمی نەورۆز؛ نۆ هاووڵاتی کورد بە شێوەیەکی کاتی لە بەندیخانەی شاری سنە ئازاد کران
هەنگاو؛ شەممە ١٦ی خاکەلێوەی ٢٧٢٥
شنۆ محەممەدی، ئاریوان شاکری، شێروان حەیدەری، ئیدریس حەیدەری، مەحموود نادری، ئەسعەد باباکەرەمی، مستەفا هوژەبری، ئەحمەد ساعدی و سیروان حاتەمی، هاووڵاتییانی کوردی خەڵکی شاری سنە کە لە پەیوەندی لەگەڵ نەورۆزی کوردستان دەستبەسەر کرابوون، بە دانانی بارمتە تا کۆتایی هاتنی دادگایەکەیان بە شێوەیەکی کاتی ئازاد کران.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی شەممە ١٦ی خاکەلێوەی ٢٧٢٥ (٥ی ئەپریلی ٢٠٢٥)، شێروان حەیدەری تەمەن ٣٧ ساڵە، ئیدریس حەیدەری تەمەن ٣٠ ساڵە، و سیروان حاتەمی تەمەن ٤٠ ساڵە، هەموویان خەڵکی گوندی "ئەوێهەنگ"ی شاری سنە و مەحموود نادری هاووڵاتی تەمەن ٤٥ ساڵە و خەڵکی گوندی دائانە کەمانگەر ناوچەی کەڵاتەرزانی شاری سنە، ئەسعەد باباکەرەمی تەمەن ٣٤ ساڵە و خەڵکی "گاوەڕ" لە بەشی ناوەندیی شاری سنە، مستەفا هوژەبری تەمەن ٢٨ ساڵە و خەڵکی گوندی "قلیان" سەر بە شاری سنە، ئاریوان شاکری تەمەن ٣٥ ساڵە و ئەحمەد ساعدی، خەڵکی شاری سنە بە دانانی بارمتەی ٥٠٠ ملوێن تمەنی بە شێوەیەکی کاتی تا کۆتایی هاتنی دادگایەکەیان لە بەندیخانەی ناوەندیی سنە ئازاد کراون.
پێشتر لە ڕۆژی شەممە ٩ی خاکەلێوەی ٢٧٢٥ (٢٩ی مارسی ٢٠٢٥)، شنۆ محەممەدی چالاکی مەدەنی تەمەن ٣٤ ساڵە و هاوژینی ئاریوان شاکری، بە دانانی بارمتە لە بەندیخانە ئازاد بوو.
ڕۆژی شەممە ٢ی خاکەلێوەی ٢٧٢٥ (٢٢ی مارسی ٢٠٢٥)، ئەسعەد باباکەرەمی و مەحمود نادری دوای بانگکران و ڕۆیشتنیان بۆ ئیتلاعاتی سپا لە شاری سنە دەستبەسەر کران.
شێروان حەیدەری، ئیدریس حەیدەری، سیروان حاتەمی، شنۆ محەممەدی، ئاریوان شاکری و موستەفا هەژبری ڕۆژی یەکشەممە ٣ی خاکەلێوەی ٢٧٢٥ (٢٣ی مارسی ٢٠٢٥)، لەلایەن هێزە ئەمنییەکانەوە دەستبەسەر کراون.
ئەحمەد ساعدی لە سەرەتای مانگی خاکەلێوەی ئەمساڵ لەلایەن هێزەکانی ئیدارەی ئیتلاعاتەوە دەستبەسەر و بۆ دەستبەسەرگەی ئەم ناوەندە ئەمنییە لە شاری سنە گواسترایەوە.
ئەم هاووڵاتییە کوردانە لە پەیوەندی لەگەڵ بەشداریکردن لە ڕێوڕەسمەکانی نەورۆزی کوردستان دەستبەسەر کراون.
لەم ناوەدا دەستبەسەرکرانی مەحمود نادری لەکاتێکدا بووە کە ئەم هاووڵاتییە لە ناوەڕاستی مانگی خاکەلێوەی ساڵی ڕابردوودا بە دانانی بارمتەی ٥٠٠ ملوێن تمەنی بە شێوەیەکی کاتی تا کۆتایی هاتنی دادگایەکەی لە بەندیخانە ئازاد کرابوو.
ناوبراو ڕۆژی سێشەممە ١٢ی خاکەلێوەی ٢٧٢٥ (٤ی مارسی ٢٠٢٥) دوای بانگکران و ڕۆیشتنی بۆ ئیدارەی ئیتلاعات لە شاری سنە دەستبەسر کرابوو.
