دوا زانیاری لەسەر کۆڵبەرانی سەردەشت / ٤ کوژراو و ٢ بریندار
١٠ ڕێبەندان ٢٧١٦، ٢١:٤٩
هەنگاو: بە گیان لە دەست دانی یەکێکی دیکە لەو کۆڵبەرانەی کە کەوتبووە ژیر بەفرەوە، ئاماری گیان لەدەستدانی کوژرانی کۆڵبەران بە هۆی هەرەسی بەفرەوە لەشاری سەردەشت گەیشتە ٤ کەس و ٢ کەسیش لەژێر چاوەدێریی پزیشکیدان.
بەپێی ڕاپۆرتی "هەنگاو، ناسنامەی چوارەمین کۆڵبەر کە لەو ڕووداوەدا گیانی لەدەستد اوە "محەممەد حەمزەیی" تەمەن ٢٢ ساڵ و خەڵکی مەهاباد ڕاگەیندراوە.
پێشتر "هەنگاو" ناسنامەی ٣ کەس لەو کۆڵبەرانەی کە گیانیان لە دەست دابوو بڵاو کردبووە.
لەو ڕووداوەدا ٣ کۆڵبەری کورد بەناوەکانی عەلی محەممەد نژاد ١٨ ساڵە، کوڕی حەمزە و خەڵکی سەردەشت، شێرزاد عەبدوڵڵاهی ٢٧ ساڵە ، کوڕی عومەر و خەڵکی سەردەشت و هیوا ئیبراهیمی ٢٢ ساڵە ، کوڕی عەبدووڵڵا و خەڵکی بانە گیانیان لە دەست داوە.
دوو کۆڵبەری دیکەش بەناوەکانی “قاسم مەحموود خدر” ٣١ ساڵە و “هێدی زاهیری ٢٤ ساڵە لە بەشی ICU نەخۆشخانەی سەردەشت ڕاگیراون و لە ژیر چاوەدێریی پزیشکیدان.
ئەو کۆڵبەرانە ڕۆژی شەممە ڕێکەوتی ٩ی ڕێبەندان کەوتبوونە ژیر ڕنووی بەفرەوە و پاش چەندین کاتژمێر چەندین کەسیان لەلایەن خەڵک و شاخەوانانی سەردەشتەوە ڕزگار کران.
