ئیتلاعاتی مەریوان لاوێکی کوردی دەستبەسەر کرد

هەنگاو: هاووڵاتییەکی خەڵکی مەریوان لەلایەن هێزە ئەمنییەکانەوە دەستبەسەر و بۆ شوێنێکی نادیار راگوێزرا.

بەپێی راپۆرتی گەیشتوو بە رێکخراوی مافی مرۆڤیی “هەنگاو”، هێزە ئیتلاعاتییەکانی شاری مەریوان، پاشنوەڕۆی ئەمڕۆ دووشەمە (٧ی جۆیەردانی ٢٨ی مەی ٢٠١٨) هێرشیان کرده سەر ماڵی هاووڵاتیەکی خەڵکی مەریوان و دەستبەسەریان کرد.

هەواڵنێری هەنگاو لە مەریوان، ناوی ئەو هاووڵاتییە کوردەی "ئەمجەد قادری" و خەڵکی گوندی "چۆڕ” راگەیاندووە.

بە وتەی سەرچاوەیەکی ئاگادار، هێزەکانی ئیدارەی ئیتلاعات بەبێ پێشاندانی هیچ جۆرە بەڵگەیەکی یاسایی هەلیان کوتاوەتە سەر مالی ئەو هاووڵاتییە کوردە و بە تۆمەتی چالاکی سیاسی دەستبەسەریان کردووە.

بە پشتبەستن بە ئاماری تۆمارکراو لە ناوەندی ئاماری ”هەنگاو“، لەماوەی مانگی ڕابردوودا (بانەمەڕ) ٤٨ هاووڵاتیی کورد لەلایەن ناوەندە ئەمنییەکانی ئێرانەوە دەستبەسەر کراون.