کوژران و برینداربوونی دوو کۆڵبەر لە سنوورەکانی پیرانشار

هەنگاو: کۆڵبەرێکی لاوی خەڵکی پیرانشار بە تەقەی ڕاستەوخۆی هێزە چەکدارەکانی ئێران کوژراو و یەکێکیش بریندار کرا.

بە پێی ڕاپۆرتی ڕێکخراوی مافی مرۆڤی هەنگاو،  بەرەبەیانی ڕۆژی یەکشەممە (١٢ی ڕەشەممەی ٢٧١٨ / ٣ی امرسی ٢٠١٩)،   هێزە چەکدارەکانی ئێران لە ناوچە سنوورییەکانی پیرانشار (گۆڕی پتکێ) تەقەیان لە پۆلێک کۆڵبەر کردووە و لەئاکامدا کۆڵبەریک کوژراوە و کۆڵبەرێکی دیکەش بریندار بووە.

هەواڵنێری هەنگاو لە شاری پیرانشار ناسنامەی ئەو کۆڵبەرە لاوەی ”سەید واحید بەرزەنجی“ کوڕی  سەید ئەحمەد ڕاگەیاندووە. ناوبراو ٣٠ ساڵانە و باوکی دوو منداڵیشە.

بە وتەی سەرچاوەیەکی ئاگادار، لە ئاکامی ئەو دەستڕێژییەدا کۆڵبەرێکی دیکەش بە سەختی بریدنار بووە، بەڵام هەتا کاتی ئامادە کردنی ئەم هەواڵە ناسنامەی بۆ هەنگاو ئاشكرا نەبووە.