دووەمین ساڵڕۆژی کوژرانی ژینا ئەمینی؛ مانگرتنی گشتی و ڕێگری هێزە ئەمنییەکان لە ئامادەبوونی بنەماڵەی ژینا لەسەر گڵکۆکەی

یەکشەممە؛ ٢٥ی خەرمانانی ٢٧٢٤

هاوکات لەگەڵ دووەمین ساڵڕۆژی کوژرانی ژینا ئەمینی لەلایەن هێزە حکوومەتییەکانی ئێرانەوە، لە لانی کەم ۱۰ شار مانگرتنێکی گشتی بەڕێوەچوو و لە هەمان کاتدا هێزە ئەمنییەکان لە شاری سەقز ڕێگرییان لە بنەماڵەی ژینا ئەمینی کرد کە بچنە سەر گڵکۆکەی لە گۆڕستانی ئایچی، و بنەماڵەکەی لە بەیانی ئەمڕۆوە لە ماڵەوە دەستبەسەرن.

بەپێی ئەو ڕاپۆرتانەی گەیشتوونەتە هەنگاو، ڕۆژی یەکشەممە ٢٥ی خەرمانانی ٢٧٢٤ (١٥ی سێپتەمبەری ٢٠٢٤) لە شارەکانی مەهاباد، سەقز، بۆکان، سنە، مەریوان، شنۆ، کرماشان، قوروه  و پیرانشار مانگرتنی گشتی لەلایەن دووکاندارانەوە بە بۆنەی ساڵڕۆژی کوژرانی ژینا ئەمینی بەرێوەچووە، ئەم مانگرتنە لەدوای داوای ڕێکخراوە مەدەنی و پاڵپشتی حیزبە سیاسییەکانی کوردستان بەڕێوە چوو.

شایتحاڵان لە شارەکانی مەهاباد، بۆکان، سنە و پیرانشار بە هەنگاویان ڕاگەیاندووە، لە کاتژمێر دووبەو لاوە، هێزە ئەمنییەکان هەرەشەیان لە دووکاندارەکان کردووە کە دەبێ دووکانەکانیان بکەنەوە و قوفڵی چەندین دووکانیان شکاندووە.

مانگرتنی دووکاندارەکان لە کاتێکدا بەڕێوەچووە، کە لە ڕۆژانی ڕابردوودا، لە شارەکانی کوردستان کەشێکی ئەمنی دروست کرابوو و هێزە ئەمنییەکان لە ناو شارەکان بە مەبەستی پێشگرتن لە بەڕێوەچوونی ڕێوڕەسمی ساڵڕۆژی کوژرانی ژینا بڵاوەیان پێ کرابوو.

هەنگاو، پێشتر لە چەندین ڕاپۆرتدا، ڕایگەیاندبوو، هێزە ئەمنییەکان شاری سەقزیان میلیتاریزە کردووە و بە بەردانەوەی ئاوی سەدی چراغ وەیس، ڕێگای چوون بۆ سەر قەبرانیی ئایچییان بەستووە، هەروەها ئەمڕۆ هێزە سەرکوتکەرەکان، بە تایبەتی سپای پاسداران ڕێگای چوون بۆ ئایچییان گرتبو و هاوکات پێنج هەلیکۆپتەر لە ئاسمانی شاری سەقزدا دەسووڕانەوە.

هەروەها، لە ڕۆژانی ڕابردوو ژمارەیەکی زۆر لە هێزە ئەمنییەکان لە شارەکانی هەمەدان، زەنجان، میاندوواو و ئورمیە هێنراونەتە نێو شارەکانی دیواندەرە، سنە، بیجار، مەهاباد و بۆکان و لەم شارانە جێگیر کراون.

لە لایەکی دیکەوە، بە پێی ئەو زانیارییانە بە دەستی هەنگاو گەیشتووە، ئیدارەی ئیتلاعاتی شاری سەقز، هەڕەشەیان لە بنەماڵەی ئەمینیی کردووە و ئیزنیان نەداوە لە ماڵ بێنەدەر و بچنە سەر گۆڕی ژینا ئەمینی لە ئایچی و لە ماڵی خۆیاندا دەستبەسەرن.

شایانی باسە، ساڵی ڕابردوو، هەر بەم شێوە بە دروستکردنی بەربەست و هێنانی هێزی چەکداری بۆ ناو شاری سەقز، ئەم شارەیان بۆ ماوەی سێ ڕۆژ میلیتاریزە کردووە و ئیزنیان نەدا بنەماڵەی ژینا ئەمینی لە ڕێوڕەسمی ساڵڕۆژی کوشتنی کچەکەیاندا بچنە گۆڕستانی ئایچی.