هەنگاو ناسنامەی سێ کۆڵبەرە بریندارەکەی سەردەشت ئاشکرا دەکات

20:53 - 16 July 2019

 

هەنگاو: تەقەی هێزە چەکدارەکانی ئێران لە سنووری سەردەشت لە کاروانێکی کۆڵبەران، بووە هۆی کوژران و بریندار بوونی لانیکەم ٤ کۆڵبەر.

بەپێی هەواڵی گەیشتوو بە ڕێكخراوی مافی مرۆڤی هەنگاو، سەرلەبەیانی ئەمڕۆ دووشەممە (٢٤ی پووشپەڕی ٢٧١٩/ ١٥ی ژوئیەی ٢٠١٩)، هێزە چەکدارەکانی ئێران لە سنووری سەردەشت تەقەیان لە کاروانێکی کۆڵبەران کردووە و کوژرانی کۆڵبەرێک و بریندار بوونی سێ کۆڵبەری لێکەوتووەتەوە.

هەنگاو ڕۆژی ڕابردوو ناسنامەی ئەو کۆڵبەرەی کە گیانی لەدەست داوە”بریاجی ئیبراهیم زادە” کوڕی خدر و خەلکی گوندی گەوەڵانی سەردەشت ڕاگەیاندبوو.

بە دواداچوونی هەواڵنێری هەنگاو ئاشکرای کرد کە یەکێک لە کۆڵبەرە بریندارەکان بە ناوی “محەمەد” خەڵکی بانە بووە و دوو کۆڵبەری خەڵکی سەردەشتیش بە ناوەکانی “مستەفا محەمەدپوور” و “جەماڵ” کوڕی ئەبووبەکر بریندار بوو.

هەواڵنیری هەنگاو لە سەردەشت ڕایگەیاند کە مسەفا بە هۆی سەختی برینەکانیەوە ڕەوانەی مەهاباد کراوە و ئەمڕۆ نەشتەرگەری بۆ ئەنجام دراوە.

چەند ڕۆژ پێش ئێستاش کۆڵبەرێکی خەڵکی سەردەشت بە ناوی “مەجید قادری” لە سنوورەکانی ئەو شارە بە تەقەی ڕاستەوخۆی هێزە چەکدارەکانی ئێران بریندار کراوە.