چارەنووسی سێ هاووڵاتیی دەستبەسەر کراوی خەڵکی سەقز نادیارە

چارەنووسی سێ هاووڵاتیی دەستبەسەر کراوی خەڵکی سەقز نادیارە

13:57 - 7 March 2020

 

هەنگاو: سێ ئەندامی بنەماڵەی یەکێک لە گیان بەختکردوانی پژاک کە هاوکات لەگەڵ شەشەمین سالڕۆژی گیان لە دەست دانی ئەو ئەندامەی پژاک دەستبەسەر کرابوون، پاش سێ حەفتە چارەنووسیان نادیارە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، سەرەڕای تێپەڕینی سێ حەفتە بە سەر دەستبەسەر کرانی سێ ئەندامی بنەماڵەی گریلایەکی گیانبەختکردووی پژاک بە ناوی “ڕەئووف شێخی” چارەنووسیان نادیارە و بەدواداچوونی بەردەوامی بنەماڵەکانیان لەو پەیوەندییەدا بێ ئاکام ماوەتەوە.

بەرەبەیانی ڕۆژی هەینی ٢٥ی ڕێبەندانی ٢٧١٩ (١٤ی فیوریەی ٢٠٢٠)، هێزە ئەمنییەکان لە شاری سەقز هەڵیانکوتاوەتە سەر ماڵی ئەو گیانبەختکردوویەی پژاک و براکەی بە ناوی ”حامید شێخی“ و دوو زاوای ناوبراویان بە ناوەکانی ”نەبی مەلاوەیسە“ و ”ئەیووب خانی“ دەستبەسەر کرد.

یەکێک لە نزیکانی بنەماڵەی شێخی لە پەیوەندییەکدا لەگەڵ هەنگاو ڕایگەیاند کە سەرباری بەدواداچوونی بەردەوامی بنەماڵە هیچ ناوەندێک خۆی بە وڵامدەر نازانێت و ئەمەش نیگەرانی لای ئێمە دروست کردووە.

هەنگاو پێشتر ڕایگەیەنادبوو ئەو هێزانە کە نزیکەی ٢٠ کەس بوون کاتژمێر ٧ی بەیانی و هاوکات لە گەڵ شەشەمین ساڵڕۆژی گیانبەتخکردنی خالید شێخی هەڵیانکوتاوەتە سەر ئەو بنەماڵەیە و سەرەڕای دەستبەسەر کردنی ئەو سێ کەسە کەڵکیان لە ئسپری وەرگرتووە و بێڕێزییان بە ژنەکانی ئەو بنەماڵەیە کردووە و هەموو وێنەکانی ناوبراویان لەپێش چاوی بنەماڵەکەی دڕیوە.