Mamoste Luqman Emînî bi sê sal û mehek girtîgehê û bêparbûn ji lixwekirina cilûbergên mamostatiyê hate sizadan

Hengaw; Şemî 30ê Tebaxa 2025an

Mamoste Luqman Emînî, pêşnimêjê Mizgefta "Çar Yarê Nebî" ya bajarê Sine û çalakvanê olî yê xelkê bajarê Ciwanroyê, ji aliyê Dadgeha Taybet bi Mamosteyan a Tehranê ve, sizayê 3 sal û 1 meh girtîgeh bi ser de hate sepandin. Navbirî berê di meşa tevgera Jin Jiyan Azadî de hatibû girtin û li ser hev bi 11 meh girtîgehê hatibû sizadan.

Li gorî rapora ku gihaye bi Saziya Mafê Mirovî ya Hengawê, di vê dawiyê de Mamoste Luqman Emînî, kesayetiyê olî yê xelkê Ciwanroyê, ji aliyê Dadgeha Taybet bi Mamosteyan a Tehranê ve, bi tohmeta “bêrêzîkirin bi pîroziyên Îslamê” sizayê sê sal û mehek girtîgeh bi ser de hate sepandin. Navirî herwisa bi bêparbûna hertimî ji lixwekirina cilên melatiyê hate sizadan.

Hengaw hatiye agehdarkirin ku, ev sizaye bi temamî û fermî hatiye derçûn û ti derfetek ji bo pêdaçûn yan nerazîbûnê tê de nemaye.

Mamoste Luqman Emînî roja Duşemî 21ê Nîsana 2025an, piştî gazîkirin bo Dadgeha Taybet a Mamosteyan li Hemedanê hatibû girtin û bo girtîgehê hatibû veguhastin û piştî 43 roj binçavkirî, roja Duşemî 2ê Hezîrana 2025an, bi danîna barimteyê û bi awayekî demkî ji girtîgehê hatibû berdan.

Ev kesayetiyê olî yê Kurd berê ji aliyê Dadgeha Taybet a Mamosteyan li bajarê Hemdanê bi tohmeta “ragirtina çekê” bi 5 sal girtîgeh, bi tohmeta “propagende li dijî hikûmetê di berjewendiya partiyên Kurdistanî de” bi salek girtîgeh û bi tohmeta “handan bo çêkirina aloziyan û piştevanîkirin ji xwenîşanderan” bi 5 sal girtîgehê hatibû sizadan.

Navbirî herwiha bi qedexekirina hertimî ji bikaranîna cilûbergên melatiyê, qedexeya hertimî ji xwendina xutbeyê û du sal dûrxistin bo bajarê Erdebîlê hatibû sizadan.

Mamoste Luqman Emînî, roja Duşemî 30ê Çileya 2023an, li ser rêya Sine bo Merîwanê, ji aliyê hêzên hikûmetê ve hatibû girtin û roja Çarşemî 22ê Şibata heman salê, piştî danîna barimteyê û bi dawekî demkî heta dawî qonxên dadgehê ji girtîgehê hatibû berdan.