کوژرانی کۆڵبەرێک بە تەقەی ڕاستەوخۆی هێزە حکومەتییەکان لە سنووری نەوسوود

هەنگاو؛ شەممە ٤ی خاکەلێوەی ٢٧٢٤

کۆڵبەرێکی خەڵکی جوانڕۆ بەناوی پەیمان ئەحمەدی، لە کاتی کۆڵبەری کردن لە سنووری نەوسوود بە تەقەی ڕاستەوخۆی هێزە چەکدارەکانی حکومەت کوژرا.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی شەممە ٤ی خاکەلێوەی ٢٧٢٤ (٢٣ی مارسی ٢٠٢٤)، هێزە چەکدارەکانی ئێران جێگیر لە سنووری نەوسوود، تەقەیان لە ژمارەیەک کۆڵبەر کردووە و لەئاکامدا کۆڵبەرێک بەناوی پەیمان ئەحمەدی تەمەن ٣٥ ساڵ و خەڵکی گوندی کاکاڕەشی سەر بە شاری جوانڕۆ کوژراوە.

بەوتەی سەرچاوەیەکی ئاگادار، تەرمی ئەو کۆڵبەرە بۆ یەکێک لە ناوەندە دەرمانییەکانی شاری کرماشان گواستراوەتەوە و تا ئێستا ڕادەستی بنەماڵەکەی نەکراوەتەوە.

پەیمان ئەحمەدی، یەکەمین کۆڵبەری کوژراو لەلایەن هێزە چەکدارەکانی کۆماری ئیسلامی ئێران لە ساڵی نوێی کوردیدا بە هەژمار دێت.