کەرەج؛ کوژران و برینداربوونی دوو هاووڵاتی کورد بە تەقەی ڕاستەوخۆی هێزە حکومەتییەکان
سەهەند کارگەر هاووڵاتی کوردی خەڵکی شاری سەحنە لە شارۆچکەی وەحدەتی کەرەج بە تەقەی ڕاستەوخۆی هێزە ئینتزامییەکانی کۆماری ئیسلامی
هەنگاو؛ دووشەممە ٦ی خاکەلێوەی ٢٧٢٤
سەهەند کارگەر هاووڵاتی کوردی خەڵکی شاری سەحنە لە شارۆچکەی وەحدەتی کەرەج بە تەقەی ڕاستەوخۆی هێزە ئینتزامییەکانی کۆماری ئیسلامی ئێران کوژرا و یەکێک لە خزمەکانی ناوبراویش بەناوی پەیمان بەسەختی بریندارکرا.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی شەممە ٤ی خاکەلێوەی ٢٧٢٤ (٢٣ی مارسی ٢٠٢٤)، لە ڕەوتی ڕاوەدوونانی هێزە ئینتزامییەکان و تەقەی ڕاستەوخۆیان لەو ئۆتۆمبێلە، هاووڵاتییەکی کورد و خەڵکی شاری سەحنە بەناوی سەهەند کارگەر تەمەن ٢٥ ساڵ گیانی لەدەستدا.
بەوتەی سەرچاوەیەکی ئاگادار، ئەو ئۆتۆمبێلە لە جووتسایدی پاسگای شارۆچکەی وەحدەتی کەرەج لەلایەن هێزە ئینتزامییەکانەوە بەر دەستڕێژی گوللە دراوە و سەهەند کارگەر سەری کراوەتە ئامانجی گوللەی ئەو هێزانە.
هەروەها کەسێکی دیکە لەو ئۆتۆمبێلەدا بەناوی پەیمان کە لە خزمەکانی سەهەند کارگەر بووە، بە سێ گوللە پێکراوە و بەسەختی بریندارکراوە و ئێستا لەژێر چاودێری تایبەتی پزیشکیدایە.
هەنگاو ئاگادارکراوەتەوە کە هێزە ئینتزامییەکان بە گومانی هەڵگرتنی ماددەی هۆشبەر تەقەیان لە ئۆتۆمبێلی هەڵگری ئەو دوو هاووڵاتییە کردووە.
