ئیلام؛ موحسین ئەحمەدی، مامۆستای قوتابخانە و لە بەڕێوەبەرانی نەورۆزی کارەزان دەستبەسەر کرا
هەنگاو؛ شەممە ٢٥ی خاکەلێوەی ٢٧٢٤
موحسین ئەحمەدی لە مامۆستایانی فەرمانگەی پەروەردە و بارهێنان و یەکێک لە بەڕێوەبەرانی ڕێوڕەسمی نەورۆز لە شارۆچکەی کارەزانی سەر بە شاری سیروان لە پارێزگای ئیلام، لە چەند ڕۆژ پێشەوە لەلایەن ناوەندە ئەمنییەکانەوە دەستبەسەر کراوە و چارەنووسی نادیارە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی چوارشەممە ٢٢ی خاکەلێوەی ٢٧٢٤ (١٠ی ئەپریلی ٢٠٢٤)، موحسین ئەحمەدی لە مامۆستایانی فەرمانگەی پەروەردە و بارهێنانی ئیلام و یەکێک لە چالاکانی مەدەنی و بەڕێوەبەرانی ڕێوڕەسمی نەورۆزی کارەزان لە پارێزگای ئیلام، لەلایەن هێزەکانی ئیتلاعاتی سوپای پاسدارانەوە دەستبەسەر کراوە.
بەوتەی سەرچاوەیەکی نزیک لە بنەماڵەی ئەحمەدی، هێزە حکومەتییەکان بەبێ نیشاندانی هیچ بەڵگەیەکی دادوەری و لەگەڵ بەکارهێنانی توندوتیژی ناوبراویان دەستبەسەر کردووە.
سەرەڕای تێپەڕبوونی چوار ڕۆژ لە دەستبەسەرکرانی موحسین ئەحمەدی، زانیارییەکی ورد لە چارەنووس و شوێنی ڕاگرتنی ناوبراو لەبەر دەستدا نییە و بەدواداچوونەکانی بنەماڵەکەی لەو بوارەدا بێ ئاکام ماوەتەوە.
جێگای ئاماژەیە کە، ڕێوڕەسمی تایبەتیی نەورۆز لە بەشی کارەزان ڕۆژی چوارشەممە ٨ی خاکەلێوەی ئەمساڵ بە بەشداریکردنی زیاتر لە ٥٠ هەزار کەس بەڕێوەچوو.
