مەریوان؛ کوژرانی هاووڵاتییەک لەلایەن هێزەکانی سوپای پاسدارانەوە
هەنگاو؛ دووشەممە ٧ی جۆزەردانی ٢٧٢٤
ئۆتۆمبێلی هاووڵاتییەکی لاوی خەڵکی مەریوان بەناوی ئاژوان کیانی، بە گومانی هەڵگرتنی شتومەکی قاچاغ، لەلایەن هێزەکانی سوپای پاسداران دراوەتە بەر دەستڕێژی گوللە و شۆفێرەکەی گیانی لەدەستداوە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ئێوارەی ڕۆژی یەکشەممە ٦ی جۆزەردانی ٢٧٢٤ (٢٦ی مەی ٢٠٢٤)، هێزەکانی سوپای پاسداران لە جاددەی گاڕانی مەریوان لە ئاکامی شوێنهەڵگرتن و تەقەی ڕاستەوخۆ لە ئۆتۆمبێلێک، شۆفێرەکەی بەناوی ئاژوان کیانییان کوشتووە.
بەوتەی سەرچاوە ئاگادارەکان، هێزەکانی سوپای پاسداران بە گومانی هەڵگرتنی شتوومەکی قاچاغ ئۆتۆمبێلی ئەو هاووڵاتییەیان داوەتە بەر دەستڕێژی گوللە و لە ئەنجامدا ئەو لاوە دەستبەجێ گیانی لەدەستداوە.
تەرمی ئاژوان کیانی بۆ یەکێک لە ناوەندە دەرمانییەکانی مەریوان گواستراوەتەوە و هەتا ئێستا ڕادەستی بنەماڵەکەی نەکراوەتەوە.
