سنە؛ کوژرانی ژنێکی گەنج لەلایەن هاوژینەکەیەوە
![](/content/upload/1/root/ayda-haydarainn.jpg)
هەنگاو؛ هەینی ٢٩ی پووشپەڕی ٢٧٢٤
ژنێکی گەنجی خەڵکی سنە، بەناوی ئایدا حەیدەریان لەلایەن هاوژینەکەیەوە بە چەکی سارد کوژرا. هۆکاری کوژرانی ناوبراو بەدەستی هاوژینەکەی، کە خۆشی هەوڵی خۆکوشتنی داوە و سەرکەوتوو نەبووە، تا ئێستا ناڕوونە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، کاتژمێر ١٢ی نیوەڕۆی ڕۆژی سەشنەبه ٢٦ی پووشپەڕی ٢٧٢٤ (١٦ی جولای ٢٠٢٤)، ئایدا حەیدەریان، تەمەن ٣١ ساڵ و خەڵکی شاری سنە بە دەستی هاوژینەکەی، بەناوی ئارام زارعییەوە کوژرا.
تۆمەتبار کە پێشتریش پێشینەی بە توندوتیژییەوە هەڵسوکەوتکردن و لێدانی هاوژینەکەی هەبووە، ئایدای لە ماڵە هاوبەشەکەیان بە لێدانی چەندین زەربەی چەقۆ کوشتووە.
شایەنی باسە کە، ئایدا حەیدەریان، فەرمانبەری دەرمانخانەی مانگی سووری سنە بووە و لە ماوەی چەند ساڵی ڕابردوودا چەندین جار لەلایەن بکوژەوە هەڕەشەی لێکراوە و بە خراپی هەڵسوکەوتی لەگەڵ کراوە.
هەنگاو ئاگادار کراوەتەوە کە ئارام زارعی دوای کوژرانی هاوژینەکەی بە چەقۆ هەوڵی خۆکوشتنی داوە و دوای چارەسەریی پزیشکی لە نەخۆشخانەدا دەستبەسەر کراوە و بۆ بەندیخانە گواستراوەتەوە.