ژنکوژی؛ ڕاپۆرتێک لە کوشتنی لەیلا مەقسوودی ژنی قوربانیی منداڵ هاوسەری لەلایەن زڕ براکەیەوە بە بیانووی پاراستنی شەرەف لە شووت
هەنگاو؛ شەممە ٩ی جۆزەردانی ٢٧٢٦
ژنێکی قوربانیی منداڵ هاوسەری بە ناوی لەیلا مەقسوودی لەلایەن زڕ براکەیەوە و بە هاوکاریی ئەندامانی دیکەی بنەماڵەکەی لە شاری شووت سەر بە پارێزگای ئورمیە کوژرا. بکوژ بە پاساوی پاراستنی شەرەف و نامووس ئەم ژنەی کوشتووە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی هەینی ١ی جۆزەردانی ٢٧٢٦ (٢١ی مەیی ٢٠٢٦)، لەیلا مەقسوودی، ٤٢ ساڵە و خەڵکی شووت، دایکی پێنج منداڵ و لە قوربانییانی منداڵه اوسەری لەلایەن زڕبراکەیەوە بە زەبری تەور کوژرا. بکوژ دوای کوشتنی خوشکەکەی، هەڵاتووە و ئێرانی بەجێهێشتووە.
بە وتەی سەرچاوە ئاگادارەکان، لەیلا لە ژیانی هاوبەشی خۆیدا ڕووبەڕووی خیانەت و توندوتیژیی خێزانی بووەتەوە و لە هاوژینەکەی جیا ببووەوە. ناوبراو بە کاری بەرگدووری خەریک بووە بەڵام دوای ڕوودانی شەڕ کارەکەی لەدەستداوە و لە دابینکردنی کرێی خانوودا دەستەوسان مابوو. لەم نێوەندەدا براکانی لە بەرامبەر پشتگیریدا، داوایان لێ کردووە بەڵێننامەیەک واژۆ بکات کە ماڵ بەجێ ناهێڵێت و دوای ئەوە کار ناکات کە لەیلا لە پەسەندکردنی سەرپێچی دەکات.
بە وتەی سەرچاوەیەکی ئاگادار، لەیلا مەقسوودی لە ئەنجامی دۆخی بەسەرداسەپاو، ناچار بە گەڕانەوە بۆ ماڵی بنەماڵەکەیان دەبێت و لە کاتی بانگهێشتکردن بۆ ماڵی خوشک و براکانی لە سەرەتادا بە ئاوی میوەی ژەهراوی بێهۆش دەکرێت و دوای بێهۆشبوون، لەلایەن یەکێک لە زڕبراکانیەوە بە وەشاندنی زەبری تەور لە کاسەی سەری، کە لە ئەنجامیدا کاسەی سەری بە تەواوی ورد بووە، گیانی لەدەست داوە.
تەرمی لەیلا مەقسوودی لە بێدەنگیدا و لە کاتێکدا کە بنەماڵە ڕێگەی بەشداریی کەسانی دیکە و چاپکردنی ئاگادارینامەیان نەدابوو، تەنیا بە بەشداریی خۆیان بەخاک سپێردرا.
جێگەی ئاماژەیە کە، تا ئێستا هیچ جۆرە سکاڵایەک لەلایەن منداڵەکان و بنەماڵەکەیەوە تۆمار نەکراوە و تەنیا سکاڵاکار، دادوەر یان داواکاری گشتییە.
