ژنکوژی؛ ڕاپۆرتێک لەسەر کوژرانی فریشتە ڕەحمانزادە و باوکی لەلایەن هاوژینی پێشوویەوە لە سەقز

هەنگاو؛ دووشەممە ٢٢ی پووشپەڕی ٢٧٢٦

فریشتە ڕەحمانزادە هاوڕێ لەگەڵ باوکی، عەلی ڕەحمانزادە، لەلایەن هاوژینی پێشووی فریشتەوە لە شاری سەقز بە چەکی گەرم کوژران. پاڵنەری بکوژ بۆ ئەنجامدانی ئەم تاوانە، هەوڵی فڕیشتە و باوکی بۆ جێبەجێکردنی بڕیاری دادگا و دەستبەسەردا گرتنی خانەباخی ناوبراو ڕاگەیەندراوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی یەکشەممە ٢١ی پووشپەڕی ٢٧٢٦ (١٢ی جولای ٢٠٢٦)، فریشتە ڕەحمانزادە، دایکی دوو منداڵ و خەڵکی گوندی «خوردەلووکی»ی سەر بە بەشی سەرشیوی سەقز، و باوکی بە ناوی عەلی ڕەحمانزادە بە چەکی گەرم کوژران.

بە وتەی سەرچاوەکانی هەنگاو، کوژرانی ئەم دوو هاووڵاتییە لە خانەباخێکدا لە سەر ڕێگای کۆنی سەقز_مەریوان ڕووی داوە کە هی خودی بکوژەکە بووە.

تۆمەتبار بە ناسنامەی سەلاح فەرەج‌پوور، تەمەن ٤٥ ساڵ و خەڵکی گوندی «کاومەلە»ی سەر بە بەشی سەرشیوی سەقز، لە کاتی سەردانی فریشتە و باوکی بە هاوڕێیەتیی چوار مەئمووری هێزە ئینتیزامییەکان بۆ بەدواداچوونی جێبەجێکردنی فەرمانی دادگا و وەرگرتنەوەی ئەو ماڵ و داراییانەی کە بەپێی بڕیاری دادگا بە فریشتە ڕەحمانزادە درابوو، تەقەی لێ کردوون و کوشتوویانی.

شایانی باسە کە دادگای شاری سەقز دوای جیابوونەوەی ئەو دوو کەسە، مافی داواکردنی تەواوی مارەیی و هەروەها مافی سەرپەرشتیکردنی دوو منداڵەکەیانی دابوو بە فریشتە.