دەستبەسەرکران و نادیاری چارەنووسی هاووڵاتییەکی تەمەن ٦٠ ساڵە لە شاری بیجاڕ
هەنگاو؛ سێشەممە ٩ی گەلاوێژی ٢٧٢٤
هاووڵاتییەکی تەمەن ٦٠ ساڵە بە ناوی ئەکبەر نەجەفیان لەلایەن ناوەندە ئەمنییەکانی کۆماری ئیسلامیی ئێرانەوە لە شاری بیجار دەستبەسەر کرا و بۆ شوێنێکی نادیار گواسترایەوە و دوای تێپەڕ بوونی حەفتەیەک هێشتا چارەنووسی نادیارە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، لە ماوەی یەک هەفتەی ڕابردوودا هاووڵاتییەکی کورد بە ناوی ئەکبەر نەجەفیان تەمەن ٦٠ ساڵە و خەڵکی شاری بیجاڕ، لەلایەن ناوەندە ئەمنییەکانەوە لە ماڵی خۆیدا دەستبەسەر کرا و بۆ شوێنێکی نادیار گواستراوەتەوە.
بەوتەی سەرچاوەیەکی ئاگادار، هێزە ئەمنییەکان بەبێ هەبوونی هیچ بەرگەیەکی دادوەری ئەکبەر نەجەفیان دەستبەسەر کردووە.
تاکوو داڕشتنی ئەم هەواڵە هیچ زانیارییەکی ورد لەسەر هۆکاری دەستبەسەرکران و شوێنی ڕاگرتن و چارەنووس و ئەو تۆمەتانەی دراوە پاڵ ئەکبەر نەجەفیان لەبەر دەست نییە.
