پیرانشار، دەستبەسەرکران و ناڕوونی چارەنووسی ڕەحمان قادری
هەنگاو؛ پێنجشەممە ٢٥ی گەلاوێژی ٢٧٢٤
هاووڵاتییەکی کورد بە ناوی ڕەحمان قادری لە لایەن هێزە ئەمنییەکانی کۆماری ئیسلامی ئێرانەوە دەستبەسەرکراو بۆ شوێنێکی نادیار گواستراوە و زانیارییەک لەسەر چارەنووسی لەبەر دەستدا نییە.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی دووشەممە ٢٢ی گەلاوێژی ٢٧٢٤ (١٢ی ئاگۆستی ٢٠٢٤)، ڕەحمان قادری، تەمەن ٢٥ساڵ و دانیشتووی گوندی ئەندێزێ سەر بە شاری پیرانشار دوای بانگکران و ڕۆیشتن بۆ ئیدارەی ئیتلاعات دەستبەسەرکراو بۆ شوێنێکی نادیار گواستراوە.
بە وتەی سەرچاوەیەکی ئاگادار، بەدواداچوونی بنەماڵەکەی بۆ زانینی چارەنووسی ناوبراو تا ئێستا بێ ئاکام ماوەتەوە و دامەزراوە ئەمنییەکان ئامادە نەبوون وەڵامێکی دیاریکراوییان لەو بارەیەوە بدەنەوە.
شایەنی باسە کە ڕەحمان قادری پێشتریش چەند جار لە لایەن دامەزراوە ئەمنییەکانەوە بانگکراوە و لێپرسینەوەی لێ کراوە.
تا کاتی نووسینەوەی ئەم ڕاپۆرتە، زانیارییەکی ورد لەسەر هۆکاری دەستبەسەر کرانی، تۆمەتە هەڵبەستراوەکان، شوێنی ڕاگرتن و چارەنووسی ئەو هاووڵاتییە لەبەر دەست نییە.
