بەندیخانەی ئورمیە؛ نایب عەسکەری بەندکراوی سیاسی کورد سزای ١٥ ساڵ بەندکرانی بەسەردا سەپێندرا
هەنگاو؛ یەکشەممە ٦ی خەزەڵوەری ٢٧٢٤
نایب عەسکەری بەندکراوی سیاسی کورد و خەڵکی ئورمیە پێشتر لەلایەن دەزگای دادوەری کۆماری ئیسلامی ئێرانەوە سزای سێدارەی بەسەردا سەپێندرابوو، لە دوای پێداچوونەوەی دۆسیەکەی، سزای ١٥ ساڵ بەندکرانی و پێبژاردنی پارەی بەسەردا سەپێندرا.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، لە ڕۆژانی ڕابردوودا، نایب عەسکەری بەندکراوی تەمەن ٤٨ ساڵی کورد کە لە سێ ساڵ پێشەوە دەستبەسەر و سزای سێدارەی بەسەردا سەپابوو، دوای ناردنی دۆسیەکەی بۆ لقی هاوئاست، لەلایەن لقی دووی دادگای شۆڕشی ئورمیەوە سزای ١٥ ساڵ بەندکران و پێبژاردنی بەسەردا سەپێندرا.
ئەم بەندکراوە سیاسییە، پێشتر لەلایەن هەمان لقی دادگای شۆڕشی ئورمیە بە شێوەی غیابی بە تۆمەتی «موحارەبە» لە ڕێگەی ئەندامەتی پارتی ژیانی ئازادی کوردستان سزای سێدارەی بەسەردا سەپێندرا و ئەم سزایە ڕۆژی شەممە ٢٦ی خاکەلێوەی ١٤٠٢ بە پارێزەکەی ڕاگەیەندرا، ناوبراو مانگی ڕەزبەری هەمان ساڵ و بۆ جارێکی دیکە و بە گۆڕانی تۆمەتەکەی لە موحارەبە بۆ بەغی، لەلایەن لقی دووی دادگای شۆڕشی ئورمیەوە سزای سێدارەکەی پشتراست کرایەوە.
نایب عەسکەری پێشتر لە هەرێمی کوردستان ئەندامی پارتی ژیانی ئازادی کوردستان (پژاک) بووە و دوای جیابوونەوە لەو حیزبە و وەرگرتنی ئەماننامە لە لایەن سوپای پاسداران، ڕۆژی چوارشەممە ٤ی خاکەلێوەی ٢٧٢١ (٢٤ی مارسی ٢٠٢١) خۆی بە ئیتلاعاتی سوپای ئورمیە ناساندووە و دەستبەسەر کراوە، ناوبراو پێنج ڕۆژ پێشتر و هاوکات دوایین ڕۆژی ساڵی ٢٧٢٠ لەگەڵ ژن و منداڵەکەی گەڕابوویەوە زێدەکەی خۆی.
هەنگاو پێشتر لەم بارەیەوە ڕایگەیاندبوو: سپای پاسداران ئەماننامەکەی بە نووسراوە ڕادەستی بنەماڵەی عەسکەری نەکردووە و تەنیا بە شێوەی زارەکی و لە ڕێگەی خزمێکیانەوە ئەو کارەی کردووە و تەنانەت لە کاتی چوونەوەی نایب و بنەماڵەکەی بۆ ئورمیە ئەوان ئاگادار بوون. بەڵام ئێستا ڕایانگەیاندووە کە ئێمە ئەماننامەمان نەداوە.
نایب عەسکەری دوای سێ مانگ ڕاگیران لە ژووری تاکەکەسیی دەستبەسەرگەی ئیتلاعاتی ئورمیە و لە کاتێکدا بە سەختی ئەشکەنجە کرابوو، بۆ بەندیخانەی ناوەندیی ئورمیە گوازرایەوە و لەو کاتەوە لە مافی مەرەخەسی بێبەشە.
شایەنی باسە، ئەم بەندکراوە سیاسییە، گورچیلەکانی بەردیان هەیە و سەرباری ئەوەش ئازاری گەدەی هەیە و ساڵی ڕابردوو بۆ ماوەی ٤ ڕۆژ لە نەخۆشخانەیەکی دەرەوەی بەندیخانە خەوێندرابوو و بەهۆی هەبوونی بەرد لە گورچیلەکانی لەژێر چاودێری دەرمانی بووە. بەڵام گورچیلەی ناوبراو بەردسازە و بەهۆی ئەوەی ئاوی خواردنەوەی بەندیخانەی ئورمیە باش نییە، نەخۆشییەکەی سەری هەڵداوەتەوە.
ژنی نایب عەسکەری لە ماوەی دەستبەسەرکرانی دوو گیان بووە و سەڕەرای بارودۆخی تایبەتی بنەماڵەکەی و نەخۆشی ناوبراو گرنگی پێنەدراوە و بە شێوەیەکی بەردەوام لە مافی خۆی بێبەش کراوە لە ماوەی دوو ساڵی ڕابردوودا بە نیشانەی ناڕەزایەتی دەربڕین بە بێبیشکرانی لە خزمەتگوزاری پزیشکی لە بەندیخانەی ناوەندی ئورمیە مانی لە خواردن گرتووە.
