قوروە؛ سەپاندنی سزای یەک ساڵ بەندکران و لێدانی ٣١ قامچی بەسەر هەژیر یەعقووبی لە دەستبەسەرکراوانی ناڕەزایەتییەکانی بەفرانبار
هەنگاو؛ چوارشەممە ۱۱ی خەرمانانی ۲۷۲۶
هەژیر یەعقووبی، هاووڵاتیی کورد و خەڵکی قوروە و لە دەستبەسەرکراوانی ناڕەزایەتییەکانی بەفرانباری ساڵی ڕابردوو، لەلایەن دەزگای دادوەریی کۆماری ئیسلامیی ئێرانەوە سزای یەک ساڵ بەندکران و لێدانی ٣١ قامچیی بەسەردا سەپێندرا.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، هەژیر یەعقووبی، هاووڵاتیی خەڵکی قوروە لەلایەن لقی ١٠٢ی دادگای تاوانەکانی شاری قوروە سزای یەک ساڵ بەندکران و لێدانی ٣١ زەربەی قامچیی بەسەردا سەپێندرا.
ئەم هاووڵاتییە کە لە کاسبکارانی شاری قوروەیە، لە ڕەوتی ناڕەزایەتییە جەماوەرییەکانی بەفرانباری ۲۷۲۵ بەهۆی هاوڕێیەتیکردنی مانگرتنی بازاڕیان و ناڕەزایەتییەکانی خەڵکی ئەم شارە لەلایەن هێزە حکوومەتییەکانەوە دەستبەسەر کرابوو و پاش ماوەیەک بە بارمتە و بە شێوەی کاتی تا کۆتاییهاتنی قۆناغەکانی دادگاییکردن ئازاد کرابوو.
