بەرزبوونەوەی ژمارەی بەندکراوانی لەسێدارە دراو لە بەندیخانەی لاکانی ڕەشت
هەنگاو؛ یەکشەممە ١١ی سەرماوەزی ٢٧٢٤
سزای سێدارەی بەندکراوێکی کورد بە ناوی سیرووس جەعفەری خەڵکی کرماشان، کە پێشتر بە تۆمەتی پەیوەندیدار بە ماددە هۆشبەرەکانەوە دەستبەسەر کرابوو و سزای سێدارەی بەسەردا سەپێندرابوو، لە ڕێکەوتی ٣٠ی خەزەڵوەر لە بەندیخانەی لاکانی ڕەشت جێبەجێ کراوە. هەنگاو پێشتر هەواڵی جێبەجێکرانی سزای سێدارەی بەندکراوێکی دیکەی کوردی لە هەمان ڕۆژ و لەو بەندیخانەیە ڕاگەیاندبوو.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانیی ڕۆژی چوارشەممە ٣٠ی خەزەڵوەری ٢٧٢٤ (٢٠ی نۆڤەمبەری ٢٠٢٤)، سزای سێدارەی بەندکراوێک بە ناوی سیرووس جەعفەری، تەمەن ٤٥ ساڵ و خەڵکی کرماشان لە بەندیخانەی لاکانی ڕەشت جێبەجێ کراوە.
بە وتەی سەرچاوەیەکی ئاگادار، ئەو بەندکراوە پێشتر بە تۆمەتی پەیوەندیدار بە ماددە هۆشبەرەکانەوە دەستبەسەر کرابوو و سزای سێدارەی بەسەردا سەپێندرابوو.
هەنگاو پێشتر هەواڵی جێبەجێکرانی سزای سێدارەی بەندکراوێکی دیکە بە ناوی شێرعەلی تەرکێشبەند، تەمەن ٥٣ ساڵ و خەڵکی گوندی "سیاچەقا"ی سەر بە شاری سەحنەی لە هەمان ڕۆژدا ڕاگەیاندبوو. ئەو بەندکراوەش بە تۆمەتی پەیوەندیدار بە ماددە هۆشبەرەکانەوە دەستبەسەر کرابوو و سزای سێدارەی بەسەردا سەپێندرابوو.
هەتا کاتی داڕشتنی ئەم هەواڵە، هەواڵی لەسێدارەدرانی ئەو دوو بەندکراوە لە میدیا حکومەتییەکان بەتایبەت میدیا پەیوەندیدارەکان بە دەزگای دادوەرییەوە بڵاو نەکراوەتەوە.
