ڕاپۆرتێک لەسەر جێبەجێکرانی سزای سێدارەی ئەفشین ئەمیری هاووڵاتیی کورد لە بەندیخانەی کرماشان
هەنگاو؛ یەکشەممە ٢١ی ڕێبەندانی ٢٧٢٤
هەفتەی ڕابردوو سزای سێدارەی بەندکراوێکی کورد و خەڵکی کرماشان بە ناوی ئەفشین ئەمیری لە بەندیخانەی ناوەندیی ئەم شارە جێبەجێ کراوە. ناوبراو پێشتر بە تۆمەتی پەیوەندیدار بە مادە هۆشبەرەکانەوە دەستبەسەر و سزای سێدارەی بەسەردا سەپێندرابوو.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی یەکشەممە ١٤ی ڕێبەندانی ٢٧٢٤ (٢ی فێبریوەری ٢٠٢٥)، سزای سێدارەی ئەفشین ئەمیری تەمەن ٣٢ ساڵ و خەڵکی کرماشان، لە بەندیخانەی دێزڵئاوای کرماشان جێبەجێ کراوە.
بە وتەی سەرچاوەیەکی ئاگادار، ئەفشین ئەمیری خەڵکی گوندی "گوڵستان"ی سەر بە کرماشان، ٦ ساڵ پێش بە تۆمەتی پەیوەندیدار بە مادە هۆشبەرەکانەوە دەستبەسەر و لە لایەن دادگای شۆڕشی کرماشان سزای سێدارەی بەسەردا سەپێندرابوو.
هەواڵی لەسێدارەدانی ئەم بەندکراوە تا کاتی داڕشتنی ئەم هەواڵە، لە میدیا حکوومەتییەکان بە تایبەت میدیاکانی نزیک لە دەزگای دادوەری ڕانەگەیێندراوە.
