جێبەجێ کرانی سزای سێدارەی سوبحان جەعفەری و محەممەد کەریم مورادی لە بەندیخانەکانی خوڕەمئاوا و کرماشان
هەنگاو؛ شەممە ٨ی سەرماوەزی ٢٧٢٥
سزای سێدارەی دوو بەندکراو بە ناوەکانی سوبحان جەعفەری و محەممەد کەریم مورادی، کە پێشتر بە هۆی تۆمەتەکانی «کوشتنی بە ئەنقەست» و «پەیوەندیدار بە ماددە هۆشبەرەکان» لە لایەن دەزگای دادوەریی کۆماری ئیسلامی ئێران سزای سێدارەیان بە سەردا سەپابوو، لە بەندیخانەکانی خوڕەمئاوا و کرماشان جێبەجێ کراوە.
بە پێی ڕاپۆرتی گەیشتوو بە ڕێکخراویی مافی مرۆڤی هەنگاو، بەرەبەیانی ڕۆژی شەممە ٨ی سەرماوەزی ٢٧٢٥ (٢٩ی نۆڤەمبری ٢٠٢٥)، سزای سێدارەی بەندکراوێکی لوڕ بە ناو سوبحان جەعفەری، لە بەندیخانەی ناوەندیی خوڕەمئاوا جێبەخێ کرا. ئەم بەندکراوە پێشتر بە تۆمەتی پەیوەندیدار بە ماددە هۆشبەرەکان دەستبەسەر و لە لایەن دەزگای دادوەریی کۆماری ئیسلامی ئێران سزای سێدارەی بە سەردا سەپابوو.
هاوکات هەر لەم ڕۆژەدا سزای سێدارەی بەندکراوێکی کورد بە ناوی محەممەد کەریم مورادی، خەڵکی کرماشان، لە بەندیخانەی ناوەندیی کرماشان( بەندیخانەی دیزڵئاوا) جێبەخێ کرا. بە وتەی سەرچاوە ئاگادارەکان، ئەم بەندکراوە لە چوار ساڵ پێشەوە بە تۆمەتی کوشتنی بە ئەنقەست دەستبەسەر و لە لایەن دەزگای دادوەریی کۆماری ئیسلامی ئێران سزای سێدارەی بە سەردا سەپابوو.
تا کاتی داڕشتنی ئەم ڕاپۆرتە، هەواڵی لە سێدارەدانی ئەم دوو بەندکراوە لە میدیاکانی حکوومەتی بە تایبەت میدیاکانی پەیوەندیدار بە دەزگای دادوەریی بڵاو نەکراوەتەوە.
