ئورمیە؛ کوژرانی محەممەد حوسێنزادە، هاووڵاتیی کورد بە تەقەی ڕاستەوخۆی هێزە حکومەتییەکان

هەنگاو؛ دووشەممە ۱۱ی خاکەلێوەی ۲۷۲۵

محەممەد حوسێنزادە، هاووڵاتیی کوردی خەڵکی ئورمیە لە ئەنجامی تەقەی ڕاستەوخۆی هێزە ئینتزامییەمانی کۆماری ئیسلامیی ئێران لەو شارەدا گیانی لەدەست دا.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی شەممە ۹ی خاکەلێوەی ۲۷۲۵ (۲۹ی مارسی ۲۰۲۵)، محەممەد حوسێنزادە، هاووڵاتیی کوردی خەڵکی گوندی "قشڵاقی تەرزیلوو"ی سەر بە شاری ئورمیە بە تەقەی ڕاستەوخۆی هێزە حکومەتییەکان گیانی لەدەست دا.

بە وتەی سەرچاوەیەکی ئاگادار، هێزە حکومەتییەکان بەبێ هۆشداریی پێشوەخت تەقەیان لە ئۆتۆمبێلی ئەو هاووڵاتییە کردووە.

ئەو هاووڵاتییە بە گومانی ئەوەی بە "هەڵگرتنی کەلوپەلی قاچاخ" ڕاگەیێندراوە، لە شارۆچکەی تەرزیلوو کراوەتە ئامانجی گوللەی هێزە حکومەتییەکان.