ڕێوڕەسمی نەورۆز؛ دەستبەسەرکرانی فەرزاد عەبدی لەلایەن هێزە ئەمنییەکان لە پاڵەی ئیلام

هەنگاو؛ پێنجشەممە ١٤ی خاکەلێوەی ٢٧٢٥

هاووڵاتییەکی کوردی خەڵکی پاڵە، ناوەندی زەڕین ئاوای شاری دێلوڕان لە پارێزگای ئیلام بە ناوی فەرزاد عەبدی دوای تەواو بوونی ڕێوڕەسمی نەورۆز لەم شارە لەلایەن ناوەندە ئەمنییەکانی کۆماری ئیسلامیی ئێرانەوە دەستبەسەر کرا. ناوبراو بە بەکارهێنانی توندوتیژییەوە دەستبەسەر کراوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی چوارشەممە ١٣ی خاکەلێوەی ٢٧٢٥ (٢ی ئاپریلی ٢٠٢٥)، فەرزاد عەبدی خەڵکی زەڕین ئاوای دێلوڕان لەلایەن هێزەکانی ئیدارەی ئیتلاعاتەوە دەستبەسەر و بۆ شوێنێکی نادیار گواسترایەوە.

بەوتەی سەرچاوەیەکی ئاگاداری هەنگاو، ئەم هاووڵاتییە دوای بەڕێوەچوونی ڕێوڕەسمی نەورۆز لە پاڵە لەلایەن هێزەکانی ئیدارەی ئیتلاعەتەوە بە توندی لێیدراوە و دەستی شکێندراوە، دەستبەسەر و بۆ شوێنێکی نادیار گواستراوەتەوە.

تاوەکوو داڕشتنی ئەم هەواڵە، زانیارییەکی ورد لەسەر چارەنووس و شوێنی ڕاگرتنی ئەم هاووڵاتییە کوردە لەبەر دەست نییە و بەدواداچوونەکانی بنەماڵەکەی لەم بارەوە بێ وەڵام ماوەتەوە.