پیرانشار؛ دەستبەسەرکران و ناڕوونی چارەنووسی عەبدوڵڵا ئەژیر
هەنگاو؛ سێشەممە ۲۶ی خاکەلێوەی ۲۷۲۵
عەبدوڵڵا ئەژیر، هاووڵاتیی کوردی خەڵکی پیرانشار، نزیک بە یەک مانگە لە لایەن هێزە ئەمنییەکانی کۆماری ئیسلامیی ئێرانەوە دەستبەسەر کراوە و تا ئێستا چارەنووسی نادیارە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، عەبدوڵڵا ئەژیر، هاووڵاتیی تەمەن ۴۵ ساڵی خەڵکی گوندی "سەروکانی" سەر بە شاری پیرانشار و باوکی سێ منداڵ، ۲۹ڕۆژی ڕابردووی بە دەستبەسەرکراوی تێپەڕ کردووە.
عەبدوڵڵا ئەژیر لە ماوەی دەستبەسەربوونیدا لە سەرەکیترین مافەکانی خۆی وەکوو مافی دەستڕاگەیشتن بە پارێزەر و چاوپێکەوتن لەگەڵ بنەماڵەکەی بێبەش بووە.
هەوڵەکانی بنەماڵەی عەبدوڵڵا ئەژیر بەمەبەستی ئاگاداربوونەوە لە بارودۆخی ناوبراو بێ ئاکام ماونەتەوە و تا ئێستا زانیارییەکی ورد لەسەر هۆکارەکانی دەستبەسەکران و ئەو تۆمەتانەی دراونەتە پاڵ ئەو هاووڵاتییە لەبەر دەستدا نییە.
ئەو هاووڵاتییە ڕۆژی یەکشەممە ۲۶ی ڕەشەممەی ۲۷۲۴ (۱۶ی مارسی ۲۰۲۵) لە شوێنی کارەکەی خۆی لە لایەن هێزە ئەمنییەکانەوە دەستبەسەر کرا و بۆ شوێنێکی نادیار گواسترایەوە.
هێزە ئەمنییەکان هاوکات لەگەڵ دەستبەسەرکرانی ئەو هاووڵاتییە کوردە دەستیان بەسەر هەندێک لە کەلوپەلە تایبەتییەکانی ناوبراودا گرتووە و لەگەڵ خۆیان بردوویانە.
