مەهاباد؛ وەهاب خەدیری پوور سزای دە مانگ بەندكرانی بەسەردا سەپێندرا
هەنگاو؛ پێنجشەممە ١٤ی خاكەلێوەی ٢٧٢٥
وەهاب خەدیری پوور، هاووڵاتیی كوردی خەڵكی مەهاباد و لە ئەندامانی بنەماڵە دادخوازەكان، لە لایەن دەزگای دادوەری كۆماری ئیسلامیی ئێران سزای دە مانگ بەندكرانی بەسەردا سەپێندراوە.
بە پێی ڕاپۆرتی گەیشتوو بە ڕێكخراوی مافی مرۆڤی هەنگاو، وەهاب خەدیری پوور، تەمەن ٣٢ ساڵ و خەڵكی مەهاباد لە لایەن دادگای شۆڕشی ئەم شارە سزای دە مانگ بەندكرانی بەسەردا سەپێندرا.
بە وتەی سەرچاوەیەكی ئاگاداری نزیک لە بنەماڵەی وەهاب خەدیری پوور، ئەم سزای بەندكرانە بە تۆمەتی "هاوكاری لەگەڵ حیزبی دێموكراتی كوردستانی ئێران" سەپاوە بەسەر ئەم هاووڵاتییەدا.
وەهاب خەدیری پوور ڕۆژی چوارشەممە ١ی ڕەشەممەی ٢٧٢٤ (١٩ی فێبریوەریی ٢٠٢٥)، دوای سێ هەفتە دەستبەسەركران بە دانانی بارمتەی ٥٠٠ ملیۆنی و بە شێوەی كاتی تا كاتیی كۆتاییهاتنی دادگاییەكەی لە بەندیخانەی ناوەندیی ئەم شارە ئازاد كرا.
هەنگاو پێشتر لەم بارەیەوە ڕایگەیاندبوو كە وەهاب خەدیری پوور لە ماوەی دەستبەسەركرانەكەیدا لە مافی چاوپێكەوتن لەگەڵ ئەندامانی بنەماڵەكەی و هەروەها دەستپێڕاگەیشتن بە پارێزەر بێبەش بووە.
وەهاب خەدیری پوور، خێزاندار و باوكی دوو منداڵە، ڕۆژی چوارشەممە ١٠ی ڕێبەندانی ٢٧٢٤ (٢٩ی جەنیوەری ٢٠٢٥) دوای بانگكرانی بۆ ئیدارەی ئیتلاعات دەستبەسەر كرابوو.
شایانی باسە كە، سوهراب خەدیری پوور برای وەهاب خەدیری پوور كە ئەندامی حیزبی دێموكراتی كوردستانی ئێران بوو، بەهاری ٢٧٢١ لە لایەن هێزەكانی سوپای پاسداران كوژرا. ناوبراو هەروەها ئامۆزای شەماڵ خەدیری پوور لە گیانبەختكردوانی بزووتنەوەی ژن ژیان ئازادی لە مەهابادە.
