ژنکوژی؛ کوژرانی ئازیتا فەلاحی لە لایەن هاوژینەکەی لە شاری سونقوڕ و کولیائی
هەنگاو؛ هەینی١٥ی خاکەلێوەی ٢٧٢٥
ژنێکی گەنجی خەڵکی قوڕوە بە ناوی ئازیتا فەلاحی لە لایەن هاوژینەکەی و باوکی هاوژینەکەی لە شاری سونقوڕ و کولیائی سەر بە پارێزگای کرماشان کوژرا. هاوژینی ناوبراو کە سەرەتا ڕایگەیاندبوو کە ئازیتا خۆی کوشتووە، دەستبەسەر کراوه.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، ئێوارەی پێنجشەممە ١٤ی خاکەلێوەی ٢٧٢٥ (٣ی ئەپریلی ٢٠٢٥(، ژنێکی گەنجی خەڵکی قوڕوە بە ناوی ئازیتا فەلاحی تەمەن ٣٦ساڵ کە دایکی دوو مناڵی ١١و ١٦ساڵەیە لە لایەن هاوژینەکەی بە هاوکاری باوکت هاوژینەکەی لە ماڵی بنەماییان بە توندی لێیدراوە و لە ئەنجامی لێدان و کوتان گیانی لە دەست داوە.
بە وتەی سەرچاوەیەکی ئاگاداری نزیک لە بنەماڵەی فەلاحی، بنەماڵەی هاوژینەکەی سەرەتا ڕایانگەیاندووە کە ئازیتا خۆی کوشتووە و دوای گواستنەوەی بۆ پزیشکی دادوەری دەرکەوتووە کە کوژراوە و هاوژینەکەشی دەستبەسەر کراوە. تا کاتی داڕشتنی ئەم هەواڵە، لە هۆکاری کوژرانی ئەم ژنە گەنجە زانیاریەک لەبەر دەستدا نییه.
شایەنی باسە کە تەرمی ئازیتا فەللاحی ئێوارەی ئەمڕۆ لە زێدی خۆی، گوندی جامەشۆڕانی سەر بە قوڕوە بە خاک سپێردرا.
بە پشت بەستن بەو ئامارانەی ناوەندی ئامار و بەڵگەنامەی ڕێکخراوی مافی مرۆقی هەنگاو، لە مانگی مارسی ٢٠٢٥ لانی کەم ٨ حاڵەتی کوژرانی ژن لە ئێران تۆمار کراوە.
