ڕاپۆرتێک لەسەر كوژرانی ئایلار زاهیرپوور، منداڵی تەمەن ١٢ ساڵ لە لایەن باوكیەوە لە شاباد
هەنگاو؛ شەممە ١٦ی خاكەلێوەی ٢٧٢٥
منداڵێكی تەمەن ١٢ ساڵ بە ناوی ئایلار زاهیرپوور، بە چەكی گەرم لە لایەن باوكیە لە شاری شاباد سەر بە كرماشان كوژرا. بیانووی بكوژ لە ئەنجامدانی ئەم تاوانە پەیوەندی ئایلار لەگەڵ دایكی بووە كە جیا لە ئەو ژیانی كردووە.
بە پێی ڕاپۆرتی گەیشتوو بە ڕێكخراوی مافی مرۆڤی هەنگاو، ئێوارەی پێنجشەممە ١٤ی خاكەلێوەی٢٧٢٥ (٣ی ئەپریلی ٢٠٢٥)، ئایلار زاهیرپوور، منداڵی تەمەن ١٢ ساڵی خەڵكی گوندی "سوێرک"ی سەر بە شاری شاباد، لە ڕێگای بەكارهێنانی چەكی "بڕنەو" لە لایەن باوكیە بە ناوی "كەیوومەرس زاهیرپوور" كوژرا.
بە وتەی سەرچاوەیەكی ئاگادار، دایک و باوكی ئایلار جیا ببوونەوە و مافی سەرپەرەستی ناوبراو بە باوكی درابوو. شەوی ڕووداوەكە كەیوومەرس زاهیرپوور بە هۆی پەیوەندی تەلەفۆنی ئایلار لەگەڵ دایكی هەوڵی كوشتنی ناوبراوی داوە.
شایانی باسە كە، بكوژ دوای ئەنجامدانی ئەم تاوانە لە ڕێگای چەكەوە هەوڵی خۆكوژی داوە و بەحاڵێكی ناجێگرەوە بۆ نەخۆشخانە گواستراوەتەوە.
