خۆی؛ دەستبەسەركرانی ئەمین سەعدووئی هاووڵاتیی كورد لە لایەن هێزەكانی ئیدارەی ئیتلاعات

هەنگاو؛ چوارشەممە ٢٨ی جۆزەردانی ٢٧٢٥

هاووڵاتییەكیی كوردی خەڵكی ناوچەی “كۆتۆل”ی سەر بە شاری خۆی، بە ناوی ئەمین سەعدووئی، لە لایەن هێزەكانی ئیدارەی ئیتلاعاتەوە بە بەكارهێنانی توندوتیژی لەم شارە دەستبەسەر و بۆ شوێنێكی نادیار گواسترایەوە.

بە پێی ڕاپۆرتی گەیشتوو بە ڕێكخراوی مافی مرۆڤی هەنگاو، ڕۆژی سێشەممە ٢٧ی جۆزەردانی ٢٧٢٥ (١٧ی ژوئەنی ٢٠٢٥)، ئەمین سەعدووئی، تەمەن ٤٣ ساڵ و خەڵكی گوندی “تاریمیش”ی ناوچەی كۆتۆل سەر بە شاری خوی، لە لایەن هێزەكانی ئیدارەی ئیتلاعات بە بەكارهێنانی توندوتیژی لەم شارە دەستبەسەر و بۆ شوێنێكی نادیار گواسترایەوە.

بە وتەی سەرچاوەیەكی ئاگادار، هێزەكانی ئیدارەی ئیتلاعات ئەم هاووڵاتییەیان بە بێ نیشاندانی بەرگەی دادوەری و بە شێوەیەكی توندوتیژانە لە یەكێك لە شەقامەكانی شار لێیان داوە و دەستبەسەریان كردووە؛ بە جۆرێك كە ئەم هەوڵە ببووە هۆی ترس و نیگەرانی خەڵكەكە.

سەرەڕای بەدواداچوونی بنەماڵەی ئەم هاووڵاتییە بە مەبەستی ئاگاداربوون لە چارەنووس و بارودۆخی تەندروستی ناوبراو تا ئێستا ناوەندە ئەمنییەكان لە پێدانی هەر جۆرە وڵامێكی ڕوون لەم بارەیەوە خۆیان پاراستووە.

تا كاتی داڕشتنی ئەم ڕاپۆرتە، زانیارییەكی ورد لەسەر تۆمەتە سەپێندراوەكان، شوێنی ڕاگرتن و چارەنووسی ئەم هاووڵاتییە كوردە لەبەر دەستدا نییە.