بەرزبوونەوەی ژمارەی لەسێدارەدراوانی بەندیخانەی قزڵحیساری کەرەج بۆ هەشت کەس، لەسێدارەدرانی پێنج بەندکراوی کورد
هەنگاو؛ پێنجشەممە ۶ی خەرمانانی ۲۷۲۵
بە ئاشکرابوونی ناسنامەی چوار بەندکراوی دیکە بریتی لە سێ بەندکراوی کورد بەناوەکانی فەرامەرز شەهبازی، ئەحمەدعەلی مێهریپوور، کازم فاتمی و ماشەڵڵا نیکووفاڵ کە سزای سێدارەکەیان لە بەندیخانەی قزڵحیسار جێبەجێ کراوە، ژمارەی بەندکراوانی لەسێدارەدراوی ئەو بەندیخانەیە بە هەشت کەس گەیشت. پێشتر ناسنامەی چوار بەندکراو بریتی لە دوو بەندکراوی کوردی دیکە بەناوەکانی ئەحمەد یووسفی، فەرەیدوون محەممەدی، حیسام محەممەدی و حوسێن بیابانی ئاشکرا کرابوو.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانیی ڕۆژی چوارشەممە ۵ی خەرمانانی ۲۷۲۵ (۲۷ی ئاگۆستی ۲۰۲۵)، سزای سێدارەی چوار بەندکراو بەناوەکانی ماشەڵڵا نیکووفاڵ و فەرامەرز شەهبازی خەڵکی هەرسینی سەر بە پارێزگای کرماشان، ئەحمەدعەلی مێهریپوور خەڵکی کۆیەشت و کازم فاتمی لە بەندیخانەی قزڵحیساری کەرەج جێبەجێ کرا.
فەرامەرز شەهبازی و ماشەڵڵا نیکووفاڵ نزیکەی شەش ساڵ پێش و ئەحمەدعەلی مێهریپوور شەش ساڵ پێش بە تۆمەتی پەیوەندیدار بە ماددە هۆشبەرەکان و کازم فاتمی نزیکەی شەش ساڵ پێش بە تۆمەتی «هەڵگرتنی ۱۲ کیلۆ شیشە» دەستبەسەر کرابوون و لە لایەن دەزگای دادوەریی کۆماری ئیسلامیی ئێرانەوە سزای سێدارەیان بەسەردا سەپێندرابوو.
هەنگاو پێشتر هەواڵی جێبەجێکردنی سزای سێدارەی دوو بەندکراوی کورد بەناوەکانی فەرەیدوون محەممەدی خەڵکی کرماشان و حوسێن بیابانی خەڵکی هەرسینی لەگەڵ دوو بەندکراوی دیکە بەناوەکانی حیسام محەممەدی خەڵکی تاران و ئەحمەد یووسفی هاووڵاتیی خەڵکی ئەفغانستان لە هەمان ڕۆژ و بەندیخانەدا ڕاگەیاندبوو.
فەرەیدوون محەممەدی پێشتر بە تۆمەتی کوشتنی بە ئەنقەست، حیسام محەممەدی لە شەش ساڵ پێش بە تۆمەتی کوشتنی بە ئەنقەست، حوسێن بیابانی پێنج ساڵ پێش بە تۆمەتی پەیوەندیدار بە ماددە هۆشبەرەکان و ئەحمەد یووسفی سێ ساڵ پێش بە تۆمەتی دەستدرێژیی سێکسی دەستبەسەر کرابوون و لە لایەن دەزگای دادوەریی کۆماری ئیسلامیی ئێرانەوە سزای سێدارەیان بەسەردا سەپێندرابوو.
هەتا کاتی داڕشتنی ئەم ڕاپۆرتە، هەواڵی لەسێدارەدرانی ئەو بەندکراوانە لە میدیا حکوومەتییەکان بەتایبەت میدیا پەیوەندیدارەکان بە دەزگای دادوەرییەوە بڵاو نەکراوەتەوە.
