ڕاپۆرتێک لەسەر جێبەجێکرانی سزای سێدارەی حەسەن سەفاریان، عیسا مورتەزەوی و مەهدی جوزیانی لە بەندیخانەکانی شیراز و خوڕەمئاوا

هەنگاو؛ هەینی ٧ی خەرمانانی ٢٧٢٥

سزای سێدارەی سێ بەندکراو دوو لەوان لوڕ و کورد بە ناوەکانی حەسەن سەفاریان، عیسا مورتەزەوی و مەهدی جوزیانی، کە پێشتر بە تۆمەتی کوشتنی بە ئەنقەست دەستبەسەر کرابوون و سزای سێدارەیان بە سەردا سەپابوو، لە بەندیخانەکانی شیراز و خوڕەمئاوا جێبەجێ کرا.

بە پێی ڕاپۆرتی گەیشتوو بە ڕێکخراویی مافی مرۆڤی هەنگاو، بەرەبەیانی ڕۆژی چوارشەممە ٥ی خەرمانانی ٢٧٢٥ (٢٧ی ئاگۆستی ٢٠٢٥)، سزای سێدارەی حەسەن سەفاریان، خەڵکی گوندی «کرونی» سەر بە شیراز، لە بەندیخانەی عادڵئاوای شیراز جێبەجێکرا. ئەم بەندکراوە پێشتر بە تۆمەتی کوشتنی بە ئەنقەست دەستبەسەر کرابوو و لە لایەن دەزگای دادوەریی کۆماری ئیسلامی ئێران سزای سێدارەی بە سەردا سەپابوو.

لە لایەکی ترەوە نیوەشەوی ڕۆژی دووشەممە ٢٠ی گەلاوێژی ٢٧٢٥ (١١ی ئاگۆست)، سزای سێدارەی بەندکراوێک بە ناوی عیسا مورتەزەوی، ٣٦ ساڵە و خەڵکی ئەلیگودەرز سەر بە لوڕستان، لە بەندیخانەی ناوەندیی خوڕەم ئاوا جێبەجێکرا. عیسا مورتەزەوی لە چوار ساڵ پێشەوە بە تۆمەتی کوشتن دەستبەسەر کرابوو و سزای سێدارەی بە سەردا سەپابوو.

هەروەها بەرەبەیانی ڕۆژی یەکشەممە ١٢ی گەلاوێژی ٢٧٢٥ (٣ی ئاگۆست)، سزای سێدارەی بەندکراوێکی دیکە بە ناوی مەهدی جوزیانی، خەڵکی شاری دێلفان سەر بە پارێزگای لوڕستان لە بەندیخابەی ناوەندیی خوڕەم اوا جێبەجێکرا. ئەم بەندکراویشە لە چوار ساڵ پێشەوە بە تۆمەتی کوشتن دەستبەسەر کرابوو و لە لایەن دەزگای دادوەریی کۆماری ئیسلامی ئێران سزای سێدارەی بە سەردا سەپابوو.

هەواڵی لە سێدارەدانی ئەم سێ بەندکراوە تا کاتی داڕشتنی ئەم ڕاپۆرتە، لە میدیاکانی حکومەتیی بە تایبەت میدیاکانی پەیوەندیدار بە دەزگای دادوەریی بڵاو نەکراوەتەوە.