جێبەجێکرانی سزای سێدارەی پێنج بەندکراو لە بەندیخانەکانی سنە، یاسووج، سمنان، شیراز و ئەلیگوودەرز

هەنگاو؛ هەینی ۷ی خەرمانانی ۲۷۲۵

سزای سێدارەی پێنج بەندکراو بەناوەکانی مەجید عابیدی، سەمەد سەیدحوسێنی، بەندکراوی لوڕ، میلاد محەممەدساڵحی، محەممەدڕەزا موریدان، بەندکراوی عەرەب و سەجاد قولیزادە، هاووڵاتیی کورد لە بەندیخانەکانی سمنان، یاسووج، شیراز، ئەلیگوودەرز و سنە جێبەجێ کراوە. ئەو بەندکراوانە پێشتر بە تۆمەتی پەیوەندیدار بە ماددە هۆشبەرەکان و کوشتنی بە ئەنقەستەوە دەستبەسەر کرابوون و سزای سێدارەیان بەسەردا سەپێندرابوو.

بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانیی ڕۆژی چوارشەممە ۵ی خەرمانانی ۲۷۲۵ (۲۷ی ئاگۆستی ۲۰۲۵)، سزای سێدارەی مەجید عابیدی تەمەن ۳۵ ساڵ لە بەندیخانەی سمنان، سەمەد سەیدحوسێنی تەمەن ۴۶ ساڵ و خەڵکی یاسووج لە بەندیخانەی یاسووج، میلاد محەممەدساڵحی تەمەن ۳۲ ساڵ و خەڵکی کاشان لە بەندیخانەی شیراز، محەممەدڕەزا موریدان خەڵکی خووزستان لە بەندیخانەی ئەلیگوودەرزی سەر بە پارێزگای لوڕستان و سەجاد قولیزادە لە بەندیخانەی سنە جێبەجێ کرا.

لە نێوان ئەو بەندکراوانەدا میلاد محەممەدساڵحی، محەممەدڕەزا موریدان و سەجاد قولیزادە چوار ساڵ پێش و سەمەد سەیدحوسێنی پێنج ساڵ پێش بە تۆمەتی هاوشێوەی کوشتنی بە ئەنقەست دەستبەسەر کرابوون و سزای سێدارەیان بەسەردا سەپێندرابوو. هەروەها مەجید عابیدی سێ ساڵ پێش بە تۆمەتی پەیوەندیدار بە ماددە هۆشبەرەکانەوە دەستبەسەر کرابوو و سزای سێدارەی بەسەردا سەپێندرابوو.

هەتا کاتی داڕشتنی ئەم ڕاپۆرتە، هەواڵی لەسێدارەدرانی ئەو پێنج بەندکراوە لە میدیا حکوومەتییەکان بەتایبەت میدیا پەیوەندیدارەکان بە دەزگای دادوەرییەوە بڵاو نەکراوەتەوە.