جێبەجێ کرانی سزای سێدارەی دوو ژن بەندیخانەکانی ناوەندیی شیراز و زەنجان
هەنگاو؛ هەینی ٧ی خەرمانانی ٢٧٢٥
سزای سێدارەی دوو ژنی کورد و تورک بە ناوەکانی میترا یاسەمەنی و بانوو موقەدەم، کە پێشتر لە دوو کەیسی جیاوازدا بە بۆنەی تۆمەتە پەیوەندییدارەکان بە «ماددەی هۆشبەر» و «کوشتنی بە ئەنقەست» سزای سێدارەیان بە سەردا سەپابوو، لە بەندیخانەکانی ناوەندیی زەنجان و شیراز جێبەجێ کرا.
بە پێی ڕاپۆرتی گەیشتوو بە ڕێکخراویی مافی مرۆڤی هەنگاو، بەرەبەیانیی ڕۆژی پێنجشەممە ٦ی خەرمانانی ٢٧٢٥ (٢٨ی ئاگۆستی ٢٠٢٥)، سزای سێدارەی ژنێکی تورک بە ناوی بانوو موقەدەم، ٥٩ ساڵە لە بەندیخانەی ئەبهەری زەنجان جێبەجێ کرا.
بانوو موقەدەم لە چوار ساڵ پێشەوە بە تۆمەتی کوشتنی بە ئەنقەستی زاواکەی بە هۆی هەڕەشە لە کچەکەی دەستبەسەر کرا و لە لایەن دەزگای دادوەریی کۆماری ئیسلامی ئێران سزای سێدارەی بە سەردا سەپابوو.
بە وتەی سەرچاوەیەکی ئاگادار، ناوبراو ساڵانێکی زۆر بە هۆی نەخۆشی مێشکی و دەروونی ئازاری دەچێشت و لە ماوەی بەندکرانیشیدا دۆخی جەستەیی و دەروونییەکەی خراپتر بووبوو؛ سەرەڕای جەختکردنی دوکتۆرەکان بۆ گواستنەوەی ناوبراو بۆ ناوەندە دەرمانییەکان، بەرپرسانی بەندیخانە ڕێگەیان لەم کارە گرت و لە دۆخێکدا لە سێدارە درا کە بە تەواویی توانای ژیان کردنی لە دەستدابوو.
هەروەها بەرەبەیانی ڕۆژی چوارشەممە ٥ی خەرمانانی ٢٧٢٥ (٢٧ی ئاگۆستی ٢٠٢٥)، سزای سێدارەی میترا یاسەمەنی، بەندکراوی کورد و خەڵکی ئیلام لە بەندیخانەی ناوەندیی شیراز جێبەجێ کرا.
میترا یاسەمەنی لە سێ ساڵ پێشەوە بە هۆی تۆمەتە پەیوەندیدارەکان بە «ماددەی هۆشبەر» دەستبەسەر کرابوو و لە لایەن دەزگای دادوەریی کۆماری ئیسلامی ئێران سزای سێدارەی بە سەردا سەپابوو.
هەواڵی لە سێدارەدانی ئەم دوو ژنە بەندکراوە تا کاتی داڕشتنی ئەم هەواڵە، لە میدیاکانی حکوومەتی بە تایبەت میدیاکانی پەیوەندیدار بە دەزگای دادوەریی بڵاو نەکراوەتەوە.
