مامۆستا لوقمان ئەمینی سزای سێ ساڵ و یەک مانگ بەندکران و داماڵینی هەتاهەتایی جلوبەرگی ئایینی بەسەردا سەپێندرا
هەنگاو؛ شەممە ۸ی خەرمانانی ۲۷۲۵
مامۆستا لوقمان ئەمینی، چالاکی مەزهەبیی خەڵکی جوانڕۆ و پێشنوێژی مزگەوتی "چوار یاری نەبی" سنە لە لایەن خانەی دادی تایبەت بە مامۆستایانی تاران سزای سێ ساڵ و یەک مانگ بەندکرانی بەسەردا سەپێندرا. ناوبراو لە ڕەوتی بزووتنەوەی ژن، ژیان، ئازادیدا دەستبەسەر کرابوو و سەرجەم سزای ۱۱ ساڵ بەندکرانی بەسەردا سەپێندرابوو.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، لەم دواییانەدا مامۆستا لوقمان ئەمینی، کەسایەتی مەزهەبیی خەڵکی جوانڕۆ، لە لایەن خانەی دادی تایبەت بە مامۆستایانی تاران بە تۆمەتی "سووکایەتی بە پیرۆزییەکانی ئیسلام" سزای سێ ساڵ و یەک مانگ بەندکران و داماڵینی هەتاهەتایی جلوبەرگی ئایینی بەسەردا سەپێندرا.
هەنگاو ئاگادار کراوەتەوە کە ئەو سزایە بەشێوەی یەکلایی بەسەر ناوبراودا سەپێندراوە و هیچ ئەگەرێکی یاسایی بە مەبەستی پێداچوونەوە یان ناڕەزایەتیی دادوەری سەبارەت بەو سزایە بوونی نییە.
مامۆستا لوقمان ئەمینی ڕۆژی دووشەممە ۱ی بانەمەڕی ۲۷۲۵ (۲۱ی ئەپریلی ۲۰۲۵)، پاش بانگکران و سەردانی دادگای تایبەت بە مامۆستایانی هەمەدان دەستبەسەر و بۆ بەندیخانە گواسترابۆوە و ڕۆژی دووشەممە ۱۲ی جۆزەردانی ۲۷۲۵ (۲ی ژوئەنی ۲۰۲۵)، دوای ۴۳ ڕۆژ بەندکران، بەدانانی بارمتە و بەشێوەی کاتی لە بەندیخانەی هەمەدان ئازاد کرابوو.
ئەو مامۆستایە پێشتر لە لایەن دادگای تایبەت بە مامۆستایانی هەمەدان بە تۆمەتی "ڕاگرتنی چەکی کەمەری" سزای پێنج ساڵ بەندکران، بە تۆمەتی "پڕۆپاگەندەی دژ بە حکومەت و بە قازانجی حیزبە کوردستانییەکان" سزای یەک ساڵ بەندکران و لە پەیوەندی لەگەڵ تۆمەتی "هاندانی خەڵک بۆ ئاژاوە و پاڵپشتی لە ناڕازییان" سزای پێنج ساڵ بەندکرانی بەسەردا سەپێندرابوو.
ناوبراو هەروەها سزای دانانی هەمیشەیی جلوبەرگی ئایینی، بێبەشی هەمیشەیی لە وتاردان و دوو ساڵ دوورخستنەوە بۆ ئەردەبیلی بەسەردا سەپێندرابوو.
مامۆستا لوقمان ئەمینی ڕۆژی دووشەممە ۱۰ی ڕێبەندانی ۲۷۲۲، لە جاددەی سنە مەریوان لە لایەن هێزە حکومەتییەکانەوە دەستبەسەر کرا و ڕۆژی چوارشەممە ۳ی ڕەشەممەی هەمان ساڵ بەدانانی بارمتە بەشێوەی کاتی هەتا کاتی کۆتاییهاتنی پرۆسەی دادگاییکردنەکەی ئازاد کرا.
