ڕاپۆرتێک لەسەر جێبەجێکرانی سزای سێدارەی پێنج بەندکراو لە بەندیخانەکانی قزڵحیسار، گورگان، ئیسفەهان و سەبزەوار

هەنگاو؛ شەممە ۸ی خەرمانانی ۲۷۲۵

سزای سێدارەی پێنج بەندکراو بەناوەکانی ئەحمەدعەلی مێهریپوور، حەمید کاکاوەند، ئارمان ئاقچەلی، حیسام دادخاە و سەعید جۆغەتای کە پێشتر بە تۆمەتی پەیوەندیدار بە ماددە هۆشبەرەکان لە لایەن دەزگای دادوەریی کۆماری ئیسلامیی ئێرانەوە سزای سێدارەیان بەسەردا سەپێندرابوو، لە بەندیخانەکانی قزڵحیسار، گورگان، ئیسفەهان و سەبزەوار جێبەجێ کرا.

بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانیی ڕۆژی شەممە ۸ی خەرمانانی ۲۷۲۵ (۳۰ی ئاگۆستی ۲۰۲۵)، سزای سێدارەی دوو بەندکراو بەناوەکانی حەمید کاکاوەند، بەندکراوی کوردی خەڵکی کەنگەڤەر سەر بە شاری کرماشان و ئەحمەدعەلی مێهریپوور کە پێشتر بە تۆمەتی پەیوەندیدار بە ماددە هۆشبەرەکانەوە دەستبەسەر کرابوون، لە بەندیخانەی قزڵحیساری کەرەج جێبەجێ کرا.

لە لایەکی دیکەشەوە بەرەبەیانیی ڕۆژی چوارشەممە ۵ی خەرمانانی ۲۷۲۵ (۲۷ی ئاگۆست)، سزای سێدارەی بەندکراوێکی تورکمان بەناوی ئارمان ئاقچەلی لە بەندیخانەی گورگان، ناوەندی پارێزگای گوڵستان جێبەجێ کرا. ئەو بەندکراوە پێشتر بە تۆمەتی پەیوەندیدار بە ماددە هۆشبەرەکانەوە دەستبەسەر کرابوو و سزای سێدارەی بەسەردا سەپێندرابوو.

هاوکات و لە هەمان ڕۆژدا، سزای سێدارەی حیسام (کەیوان) دادخاە، تەمەن ۴۰ ساڵ و خەڵکی قەزوین لە بەندیخانەی ناوەندیی ئیسفەهان (بەندیخانەی دەستگرد) جێبەجێ کرا.

بە پێی هەواڵی ڕێکخراوی مافی مرۆڤی ئێران، ئەو بەندکراوە چوار ساڵ پێش بە تۆمەتی پەیوەندیدار بە ماددە هۆشبەرەکانەوە دەستبەسەر کرابوو و سزای سێدارەی بەسەردا سەپێندرابوو. ناوبراو سێ ساڵی لە بەندیخانەی نەجەف ئاباد تێپەڕ کردبوو و بە مەبەستی جێبەجێکرانی سزاکەی بۆ بەندیخانەی دەستگرد گواسترابۆوە.

هەروەها بەیانیی ڕۆژی سێشەممە ۲۸ی گەلاوێژی ۲۷۲۵ (۱۹ی ئاگۆست)، سزای سێدارەی بەندکراوێکی تورک بەناوی سەعید جۆغەتای لە بەندیخانەی ناوەندیی سەبزەوار سەر بە پارێزگای خوراسانی ڕەزەوی جێبەجێ کرا. ئەو بەندکراوە پێشتر بە تۆمەتی پەیوەندیدار بە ماددە هۆشبەرەکان دەستبەسەر و لە لایەن دەزگای دادوەریی کۆماری ئیسلامیی ئێرانەوە سزای سێدارەی بەسەردا سەپێندرابوو.

هەتا کاتی داڕشتنی ئەم ڕاپۆرتە، هەواڵی لەسێدارەدرانی ئەو بەندکراوانە لە میدیا حکوومەتییەکان بەتایبەت میدیا پەیوەندیدارەکان بە دەزگای دادوەرییەوە بڵاو نەکراوەتەوە.