مەریوان؛ ڕاپۆرتێک لەسەر دەستبەسەرکرانی پەیمان نادریان بە بەکارھێنانی توندوتیژییەوە
هەنگاو؛ شەممە ۸ی خەرمانانی ۲۷۲۵
پەیمان نادریان، هاووڵاتیی کورد و خەڵکی شاری مەریوان لە لایەن هێزە ئەمنییەکانی کۆماری ئیسلامیی ئێران بە بەکارھێنانی توندوتیژییەوە دەستبەسەر کرا و بۆ شوێنێکی نادیار گواسترایەوە.
بە پێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانیی ڕۆژی چوارشەممە ۵ی خەرمانانی ۲۷۲۵ (۲۷ی ئاگۆستی ۲۰۲۵)، پەیمان نادریان، تەمەن ۲۲ ساڵ و خەڵکی گوندی «دەرەناخە»ی سەر بە شاری مەریوان لە لایەن هێزە ئەمنییەکانەوە دەستبەسەر کرا.
بە وتەی سەرچاوەیەکی ئاگادار، هێزە ئەمنییەکان هەڵیانکوتاوەتە سەر ماڵی بنەماڵەی ئەو هاووڵاتییە و بە بەکارھێنانی توندوتیژی و لێدان و کوتانەوە دەستبەسەریان کردووە و دەستیان بەسەر مۆبایلەکەیدا گرتووە.
هەتا کاتی داڕشتنی ئەم هەواڵە، زانیارییەکی ورد لەسەر هۆکارەکانی دەستبەسەرکران، ئەو تۆمەتانەی دراونەتە پاڵ ئەو هاووڵاتییە و چارەنووس و شوێنی ڕاگرتنی لەبەر دەستدا نییە.
