درێژکردنەوەی ماوەی دەستبەسەرکران، ڕاپۆرتێک لە سەر دۆخی محەممەد پەروازە، هاووڵاتیی خاوەند پێداویستیی تایبەت

هەنگاو؛ یەکشەممە ٩ی خەرمانانی ٢٧٢٥

محەممەد پەروازە، هاووڵاتیی کورد و خاوەن پێداویستیی تایبەت و خەڵکی مەریوان کە لە مانگی ڕابردووەوە لە لایەن هێزەکانی ئەمنییەتی کۆماری ئیسلامی ئێران دەستبەسەر کراوە ، بەم دواییانە ماوەی دەستبەسەر کرانەکەی بۆ مانگێکی دیکە درێژ کراوەتەوە.

بە پێی ڕاپۆرتی گەیشتوو بە ڕێکخراویی مافی مرۆڤی هەنگاو، محەممەد پەروازە، ٣٠ ساڵە، باوکی سێ منداڵ و خەڵکی گوندی «نێ» سەر بە مەریوان، ماوەی ٣٩ ڕۆژی ڕابردووی لە دەستبەسەرگەی ئەم شارە تێپەڕاندووە و دۆخی یاسایی ناوبراو نادیارە.

بە وتەی سەرچاوەیەکی ئاگاداری نزیک بە بنەماڵەی محەممەد پەروازە، ئەم هاووڵاتییە سەرەڕای ئەوەی کە خاوەن پێداویستیی تایبەتە، سەرپەرشتیاری دایک و خوشکەکەی خۆیشی لە ئەستۆدایە.

ئەم هاووڵاتییە لە ماوەی یەک مانگ و حەوت ڕۆژی ڕابردووەوە لە سەرەتایی ترین مافی خۆی وەک دەستپێڕاگەیشتن بە پارێزەر و هەروەها چاوپێکەوتن بێبەش بووە.

محەممەد پەروازە ڕۆژی چوارشەممە ١ی گەلاوێژی ٢٧٢٥ (٢٣ی جولای ٢٠٢٥)، لە گوندی نیشتەجێی خۆی دەستبەسەر کرابوو.

ئەم هاووڵاتییە پێش لەمەش بە هۆی چالاکییەکانی دەستبەسەر کرابوو و لە ژێر چاوەدێری و گرتنی  دەزگای دادوەریی کۆماری ئیسلامی ئێراندایە.