جوانڕۆ؛ زەخت خستنەسەر مێهری خوسرەویزادە، مامۆستای پەروەردەیی قوتابخانەی سەرەتایی فێردەوس سەبارەت بە پێشکەشکردنی سروودە کوردییەکان
هەنگاو؛ سێشەممە، ٦ی خەزەڵوەری ٢٧٢٥
لە درێژەی گوشارە ئەمنییەکان بۆسەر مامۆستایان، دوای پێشکەشکردنی سروودە ئازادیخوازانەکانی "بە تەنیا جێم مەهێڵن" و "رێی خەبات" لە لایەن کچە قوتابیانی قوتابخانەی سەرەتایی فێردەوس لە شاری جوانڕۆ، مێهری خوسرەویزادە، مامۆستای بەشی پەروەردەو بەرپرسیار لە ڕێنماییکردن و هاوکاری قوتابیان بۆ پێشکەشکردنی ئەم سروودانە، لە مافی وەرگرتنی هەر چەشنە بەرزبونوەوەی پلە و بەرپرسیارەتییەکی ئیداری بێبەش کرا. هەروەها زەیتوون کۆهزادی، بەڕێوەبەری هەمان قوتابخانە، دوابەدوای خوێندنی هەمان سروود لەلایەن دەزگا ئەمنییەکانەوە بانگهێشت کرا و لە پۆستی بەڕێوەبردن دوورخرابۆوە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، مێهری خوسرەویزادە، مامۆستای بەشی پەروەردەو بەرپرسی یارییدەر و ڕێنوێنیکەری قوتابیان لە پێشکەشکردنی سروودی “بەتەنیا جێم مەهێڵن" و سروودی ئازادیخوازانەی “ڕێی خەبات” لە قوتابخانەی سەرەتایی فێردەوس لە شاری جوانڕۆ، دوای چەند قۆناغێک لە بانگهێشتکردن و لێپرسینەوە لە لایان ئیدارەی ئیتلاعات ،جگە لە مافی وانەگوتنەوە لە مافی هەرچەشنە بەرزکردنەوەیەکی بەرپرسیارێتیی ئیداری بێبەش کراوە.
مێهری خوسرەویزادە و زەیتون کۆهزادی دوابەدوای خوێندنی سروودەکان ، پاش بانگهێشت کردن و لێپرسینەوەیە لە لایان ئیدارەی ئیتلاعاتی جوانڕۆ، لەم دواییانەدا لەلایەن لقی یەکەمی خانەی دادی گشتی و شۆڕشی شاری جەوانڕۆ بە تۆمەتی “پڕوپاگەندە دژی نیزام” تۆمەتبار کران.
مێهری خوسرەویزادە، مامۆستای بەشی پەروەردەو بەرپرسی یارییدەر و ڕێنوێنیکەری قوتابیان لە پێشکەشکردنی سروودەکان، لە ساڵانی ڕابردووشدا بە بۆنەی ساڵوەگەڕی کیمیابارانی هەڵەبجە، سروودی شۆڕشگێڕانە و ئازادیخوازانەی وێڕای قوتابیان پێشکەش کردووە؛ لەوانە، وتنەوەی سروودی «بێ تانیا جەم مەهێڵە» بە جلوبەرگی کوردی و پێشکەشکردنی سروودی شۆڕشگێڕانەی «ڕێی خەبات».
لە ڕاپۆرتی پێشووتری هەنگاو باس لەوە کرابوو کە “زەیتون کۆهزادی” بەڕێوبەری قوتابخانەی سەرەتایی کچانەیی فێردەوس بەهۆی بڵاوبوونەوەی ڤیدیۆی سروودی شۆڕشگێڕانەی “ڕەیی خبات_راە مبارزە” لە سۆشیال میدیا ، لە ئەرکی بەڕێوبەرایەتی قوتابخانەکە دوورخرایەوە و وەک مامۆستا لە هەمان قوتابخانە وانە دەڵێتەوە. هەروەها بەرپرسانی ئیدارەی فێرکاری و پەروەردە، چوار ملوێن تمەن لە پارەی مانگانەی ئەو مامۆستایە وەک سزای تەواوکەر، دەبڕن.
شایانی باسە لە سەرەتادا ، دامودەزگا پەیوەندیدارەکان بڕیاریان وابوو کە زەیتون کۆهزادی و مێهری خوسرەویزادە بە تەواوی لە سیستەمی فێرکاری و پەروەردەی پارێزگا دەربکرێن، بەڵام پاش پێداچوونەوە و هەندێک تێڕوانین، ئەم بڕیارە دەستکاری کرا و لە کۆتاییدا بەلابردنیان لە پلەی بەڕێوەبەریی قوتابخانەو ستاندنی مافی بەرزکردنەوەی پلە، سنووردارکرایەوە.
لە ماوەی ساڵانی ڕابردوودا، پێشکەشکردنی سروودی کوردی و وانەوتنەوە بە زمانی کوردی هەمووکات کاردانەوەی توندی ئەمنی و گوشار خستنەسەر مامۆستایان و بەڕێوەبەرانی قوتابخانەکانی لە لایان داموودەزگا حکومییەکانی کۆماری ئیسلامی ئێرانەوەی بەدووا بووە.
