تاران؛ ڕاپۆرتێک لەسەر دەستبەسەر کردن و ئەشکەنجەدانی هاووڵاتییەکی کورد خەڵکی باشووری کوردستان بە تۆمەتی سیخوڕی
هەنگاو؛ یەکشەممە، ۱۱ خەزەڵوەری ۲۷۲۵
هاوڵاتییەکی خەڵکی ناوچەی سەید سادق سەر بە پارێزگای سلێمانی هەرێمی کوردستان بە ناوی "کاروان"، دوای چەند ڕۆژێک لە شەڕی ئێران و ئیسرائیل کە ١٢ ڕۆژەی خایاند، لە تاران دەستبەسەر و ئەشکەنجە دراوە. ئەم هاوڵاتییە بە بێ هیچ پاساوێک وەک تۆمەتبارێکی سیاسی چوار مانگ دەستبەسەرکراوە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، کاروان، نزیکەی ٤٥ ساڵی تەمەنە و خەڵکی گوندی "شانەدەر"ی سەر بە شارۆچکەی سەید سادق، کە لەلایەن هێزە ئەمنییەکانی کۆماری ئیسلامیی ئێرانەوە لە تاران دەستبەسەر کرابوو، ماوەیەک لەمەوبەر دوای چوار مانگ دەستبەسەر و ئەشکەنجەدان ئازاد کرا.
شیاوی باسکردنە کە، کاروان لە کاتی دەستبەسەرکردنیدا تووشی ئەشکەنجەیەکی توندی دەروونی و جەستەیی کراوە بە ئامانجی دەستکەوتن بە دانپێدانانێکی زۆرەملێ لە دژی خۆی لە ژێر ناوی "پەیوەندی و سیخوڕی کردن بۆ ئیسرائیل".
ئەم هاووڵاتییە دوای پازدە ڕۆژ لە دەستبەسەرکردن، لە ڕێگەی ناسیاوێکەوە، بنەماڵەکەی لە بارودۆخی خۆی ئاگادار دەکاتەوە، براکەی سەفەری تاران دەکات و دوای ماوەیەکی زۆر چاوی پێی کەوتووە.
دوای بەرگەگرتنی چوار مانگ دەستبەسەری و ئەشکەنجە، ماوەیەک پێش ئێستا لە بەندیخانەیەکی تاران ئازاد کرا و گەڕایەوە بۆ ناوچەی سەید سادق لە هەرێمی کوردستان.
ئەم هاووڵاتییە کوردە لە گرتە ڤیدیۆیێکدا کە لە سۆشیال میدیا بڵاویکردووەتەوە، ڕایگەیاندۆ کە ڕۆژی پێنجشەممە ۵ی پووشپەڕی ۲۷۲۵ ( ۲۶ی ژوانی ۲۰۲۵) لە کاتێک دا کە بە مەبەستی کڕینی کەرەستەی پزیشکی و پاکوخاوێنی چووەتە تاران بە بێ هیچ ڕوونکردنەوەیەک، لە لایەن هێزە ئەمنییەکانەوە دەستبەسەر کراوە .
